I KA kafo balimacɛ dɔ b’a ka kalan fɔlɔ kɛra lajɛnba dɔ la. I siginin lo n’i be yɛlɛmisɛn kɛra walisa k’a jija. A ka kalan lamɛntɔ, i ninsɔn ka di kosɔbɛ k’a ye ko Ala sagokɛlaw be fɔrɔmasɔn ɲuman lo sɔrɔ. I hakili b’a la tuma min na o balimacɛ y’a ka kalan fɔlɔ kɛ ani i y’a ye ko a ye ɲɛtagaba yɛrɛ lo kɛ kabi a ye piyɔniyew ka lakɔli kɛ. Ani, ale n’a muso ye Masaya waajulikɛlaw ka lakɔli kɛ a ma mɛɛn. K’a to i be tɛgɛrɛ fɔra o balimacɛ ye a ka kalan diiman kosɔn, i yɛlɛmana ka filɛri kɛ i gɛrɛfɛ n’i be miirila Ala sagokɛlaw bɛɛ be fɔrɔmasɔn min sɔrɔla.

Bibulu tun kɔnna k’a fɔ ko wagati dɔ bena se o min na Jehova sagokɛlaw bɛɛ bena kɛ a “ka kalandenw ye.” (Ezayi 54:13). An b’o wagati lo la. An be fɔrɔmasɔn sɔrɔ an ka gafew kɔnɔ, nka o dɔrɔn tɛ. An b’o sɔrɔ fana lajɛnw, lajɛnbaw ani lakɔli caaman na minw kuun ye k’an dɛmɛ an ka se ka kunkanbaara tigitigi dɔw dafa Jehova ka ɔriganisasiyɔn kɔnɔ. Tilanyɔrɔ nin na, an ben’a ye cogo min na o fɔrɔmasɔnw bɛɛ b’a yira ka gwɛ ko Ala ka Masaya be sen kan.