O MATADREDREDRE vua na tacida e vunau tiko ena buturara. Na tacida qo e lewe ni nomu ivavakoso qai imatai ni gauna qo me vunau kina ena soqo ni tabacakacaka. Ni o vakarorogo tiko ena nona vunau, o qoroya dina na noda vakavulici na tamata ni Kalou. O vakasamataka lesu na imatai ni gauna e vakaitavi kina ena buturara kei na vanua sa mai yacova qo! E yaga vakalevu ena nona toso vakayalo na nona vuli ena Koronivuli ni Cakacaka Vakapainia. Erau sa qai vuli oti tale ga kei watina ena Koronivuli ni iTalatala ni Matanitu. Ni o vakasausau ena nona ivunau totoka, o veiraiyaki qai vakasamataka na veivakavulici e caka vei keda kece na tamata ni Kalou.

E parofisaitaka na iVolatabu na gauna ena ‘vakavulici ira kina o Jiova’ na nona tamata. (Aisea 54:13) Eda sa bula donuya tu na gauna qori. Eda vakavulici ena noda ivola, ena soqoni, soqo ni tabacakacaka, soqo ni veiwasewase kei na koronivuli tale eso me vakarautaki keda ena duidui itavi ena isoqosoqo i Jiova. Eda na dikeva ena iwasewase qo, ni vuli kece qori e vakadinadinataka ni sa veiliutaki dina tiko ena gauna qo na Matanitu ni Kalou.