A KONU yẹsẹ dile hodọtọ he to oplò ji lọ to hodọ. Jọja de wẹ sọn agun towe mẹ, he to hodidọ etọn tintan na to plidopọ ji. Dile hiẹ to vivi hodidọ etọn tọn dù, a to nulẹnpọn do lehe azọ́nplọnmẹ he omẹ Jiwheyẹwhe tọn lẹ nọ mọyi jiawu do ji. A flin vivẹnu he jọja ehe do to whenue e wazọ́n tintan to oplò ji—bosọ to pinpọn obá he mẹ e ko yinukọn jẹ todin! E basi nukọnyiyi susu to Wehọmẹ Sinsẹ̀nzọn Gbehosọnalitọ tọn yìyì godo. To agọe pete, ewọ po asi etọn po sọ yì Wehọmẹ Wẹndagbe-Jlatọ Ahọluduta lọ tọn lẹ tọn. Dile a to pẹ́hò na hodidọ dagbedagbe etọn, a pọ́n mẹhe lẹdo we lẹ bo lẹnnupọndo nuplọnmẹ he omẹ Jiwheyẹwhe tọn lẹpo to mimọyi ji.

Biblu dọ dọdai ojlẹ de tọn whenue omẹ Jiwheyẹwhe tọn lẹpo na yin “pinplọn gbọn Jehovah dali.” (Isa. 54:13) Ojlẹ enẹ mẹ wẹ mí to gbẹnọ te. E ma yin owe mítọn lẹ kẹdẹ gblamẹ wẹ mí nọ yin pinplọn gbọn gba, ṣigba gbọn opli po plidopọ mítọn lẹ po gblamẹ ga, gọna wehọmẹ voovo lẹ he yin awuwlena nado hẹn mí pegan na azọ́ndenamẹ tangan lẹ to titobasinanu Jehovah tọn mẹ. To adà ehe mẹ, mí na gbadopọnna lehe nuplọnmẹ ehe lẹpo yin kunnudenu he họnwun dọ Ahọluduta Jiwheyẹwhe tọn to gandu do.