NGATU tje ove mo tara komurumendu omutanda ngu ri mombongo ove mu u karera, ngu ma yandja ehungi re etenga pomaworonganeno omanene. Nove outu okumeṱameṱa ngunda amo puratene ku ye, nokutjaterwa i omuano ovakarere vaMukuru mu ve muna omahongero omawa. Outu okuzemburuka ozongondjero zomutanda ngwi indu tja yandja ehungi re etenga mombongo, nambano tara ma yandja ehungi pomaworonganeno omanene! Eye wa muna omahongero mOskole yOviungura vyOkuzuvarisa okuzambo aka muna omahongero pOskole yOviungura vyOvakandjira. Nu katjisupi nai, eye nomukazendu we va ri nondjoroka yokuyenda kOskole yOvazuvarise vOuhona. Ngunda amo tono omake mena rehungi ewa nda yandjwa, ove outu okutara ongondoroka na ove nu outu okuripurira komahongero ovakarere vaMukuru avehe ngu ve muna.

Ombeibela ya kwizika ohunga noruveze indu Jehova ‘omuini mu ma hongo’ ovakarere ve avehe. (Jes. 54:13) Eṱe nai tu hupa moruveze ndwo. Eṱe tu muna omahongero okupitira momambo wetu na mombongo, momaworonganeno worukondwa, momaworonganeno wotukondwa na mozoskole pekepeke nḓa ungurirwa okuturongerisira oviungura vyorive motjira tjaJehova. Morupa ndwi, matu katara kutja omahongero nga ya yandja vi otjiraisiro tjokutja Ouhona waMukuru nai u honapara.