EVA e be were owhẹ nọ whọ be gaviezọ kẹ oniọvo nọ o bi ru ẹme evaọ eplatfọmo na. Ukoko ra oniọvo-ọmọzae nana ọ rrọ, yọ ọnana họ ẹme ọsosuọ riẹ evaọ okokohọ. Nọ ẹme riẹ ọ be daruọ owhẹ oma na, u te bi gbe owhẹ unu ọvo kpahe oghẹrẹ nọ Jihova o bi ro wuhrẹ idibo riẹ. Iroro ra i te kpohọ ẹme ọsosuọ nọ oniọvo nana o ru evaọ obọ ukoko ra, enẹna unu riẹ u bi muẹme. O wo ẹnyaharo ziezi nọ o kpohọ Isukulu Ekobaro Oke-Kpobi no. Kẹle na, avọ aye riẹ a nwrotọ no Isukulu Rọkẹ Etausiuwoma Uvie Na. Nọ a be tehe abọ fikinọ oniọvo na ọ riẹ ẹme riẹ ru ziezi na, who te rri wariẹ bi roro kpahe oghẹrẹ nọ Ọghẹnẹ o bi ro wuhrẹ idibo riẹ.

Ebaibol na ọ ta kpahe oke nọ Jihova o ti ro “wuhrẹ” idibo riẹ kpobi. (Aiz. 54:13) Oke yena ma rrọ na. Orọnikọ ebe mai ọvo a be jọ wuhrẹ omai hi, rekọ te iwuhrẹ ukoko, ikokohọ esese gbe ilogbo, gbe isukulu sa-sa nọ a ruẹrẹhọ re e sai fiobọhọ kẹ omai te kẹ iruo sa-sa evaọ ukoko Jihova. Evaọ abọ nana, ma te ta kpahe epanọ iwuhrẹ nana kpobi i bi ro dhesẹ nọ Uvie Ọghẹnẹ u muhọ esuo no.