СІЗ сахнадағы жас баяндамашыға сүйсініп, езу тартасыз. Бұл — оның конгресте алғаш рет баяндамамен шығуы. Баяндаманы тыңдай отырып, Құдай халқы алып жатқан білімнің кереметтігіне тәнті боласыз. Сіз оның алғаш тапсырмамен шыққан кезін де ұмыта қойған жоқсыз. Ал енді, міне, ол үлкен сахнада тұр. Алдымен ол теократиялық қызмет мектебіне жазылған еді, сосын Ізашарлық қызмет мектебін бітірді. Ал жақында жұбайымен бірге Патшалықты жариялаушыларға арналған мектепке барып келді. Оның керемет баяндамасынан кейін қол соға отырып, айналаңызға қарайсыз да, қызметшілерінің бәріне Құдайдың қандай білім беріп жатқаны жайлы ойға кетесіз.

Киелі кітапта Ехобаның күллі халқы оның өзінен тәлім алатын уақыттың келетіні айтылған (Ишая 54:13). Сол уақыт келіп жетті. Бүгінде біз әдебиеттерден ғана емес, жиналыстар мен конгрестерде, түрлі мектептерде білім аламыз. Мұндай мектептер бізді ұйымның ісіне көбірек үлес қосуға дайындау мақсатымен ұйымдастырылған. Бұл бөлімде осындай білім беру бағдарламасы Құдай Патшалығының билік етіп жатқанын қалай дәлелдейтіні қарастырылады.