EIE ua mu kuelela ni kisangusangu kioso mu ku mona o muboki ua mu bhanga diskursu diambote. Muéne muzangala ua kilunga kiê iu ua mu bhanga o diskursu diê dia dianga mu kiônge kia ilunga. Kioso ki uia ni kuívua o diskursu diambote, eie u diuana mu ku mona o ulongelu uambote uene mu tambula o mundu ua Nzambi. Eie u di lembalala o veji ia dianga i ua mono o munzangala iú ku bhanga diskursu—kuila ka kexile hanji ni uhete ua ku longa! Maji o xikola ia Ukunji ua Nzambi ni xikola ia Aboki a Thembu loso ia bandekesa o uhete uê. Muéne ni muhatu’ê a bhiti ué mu Xikola ia Akunji a Utuminu. Mu kithangana kia ku ximana o diskursu diambote dia bhange phang’etu, eie u tala ku jimbandu anga u banza mu ulongelu uambote uene mu tambula o mundu uoso ua Nzambi.

O Bibidia ia zuelele kuila, kueji kuíza thembu, o mundu ua Nzambi eji “kala maxibulu a Jihova.” (Iza. 54:13) Etu tuala kiá mu thembu ienii. Kene mu tu longa ngó bhu kaxi ka madivulu metu kana, maji mu kaxi ka iônge, kála o kiônge kia ilunga, kiônge kia dikota ni mu kaxi ka ji xikola javulu ji tu longa kiebhi ki tu kumbidila kiambote o ikalakalu mu kilunga kia Jihova. Ku mbandu íii, tua-nda di longa kiebhi o milongi i tuene mu tambula, ilondekesa kuila o Utuminu ua Nzambi ua mu tumina kiá.