OVE kuna kuhafera siuyungwa esi ana kugava muuyungi. Age kuna kara munazinyetugara gomombungakriste zeni, ano aso siuyungwa sendi sokuhova posigongi. Ove lina kutetura edeuro eli ava gwana vantu vaKarunga. To diworoka siuyungwa sendi sokuhova esi ga geve mombungakriste. Age ga gwana edeuro moSikora zoUkareli ntani moSikora zoVazuvhisi wokukarerera. Nage namukadendi ntani tupu kava ka tundire koSikora zoVazuvhisi woUhompa. Apa muna kusakerera, to tarurura mombunga nokugazadara kerongo eli ava gwana vantu navenye vaKarunga.

Bibeli kwa pumbire kosiruwo esi vantu vaJehova Karunga nga va “ronga,” mwene. (Jes. 54:13) Ose kuna kuparuka posiruwo oso. Ose kapi tupu ava tu rongo kupitira moyimbapiratjangwa nye hena momapongo nomoyigongi nomonosikora edi za wapaika mbunga zaJehova. Moruha oru, ngatu ka konakona omu erongo olyo lya gava umbangi asi Uhompa waKarunga kuna kupangera.