OSEVELE ye kiese kiawonso mu kuma kia mpovi ofilanga longi kun’evovelo. O mpovi ndioyo nleke a nkutakani eno, ofilanga longi diandi diantete muna lukutakanu lwampwena. Ekolo owanga longi diandi, osivikidi kikilu e mpila ina nkangu a Nzambi belongelwanga. Osungamene e ngolo kavangidi o nleke ndioyo mu fila e longi diandi diantete kun’evovelo, kadi kwandá katukidi kala mu lwaka muna tezo kiaki. Wanungunuka kikilu muna mwanda vava kakota Sikola ya Salu kia Kimviti a Nzila. Yandi yo nkaz’andi ke kolo ko bakotele Sikola ya Ateleki a Kintinu. Ekolo osikanga makonzo mu kuma kia longi diambote kafididi o mpangi, otadidi va ndambu yo yindula e malongi betambulanga nkangu awonso a Nzambi.

Nkand’a Nzambi wasakula e ntangwa ina o nkangu awonso a Nzambi ‘ulongwa kwa Yave.’ (Yes. 54:13) Mu ntangwa yayi tuzingilanga. Ke tutambulanga kaka malongi mu nkanda mieto ko kansi mpe, muna tukutakanu tweto twa nkutakani, twa zunga, twa mvivu ye muna sikola za mpila mu mpila zikubikwanga mu kutulonga una tulenda lungisila konso kiyekwa muna nkubik’a Yave. Mu kunku kiaki, tubadika una e sikola zazi zawonso zisongelanga e ziku vo Kintinu kia Nzambi mu yala kina.