WUNATUMBI chimwemweta hampinji yinakuhosha nhoshi mpanji hachinañamu. Himanakweyi wakansi wamuchipompelu chenu, nawa nakuhosha mpanji yindi yatachi muprogilamu yahakupompa kweneni. Hampinji yiwunakutiyilila mpanji yindi wunahayami chikupu chinakuyidizishawu antu jaNzambi. Dichi hiwukwanuka mpanji yindi yatachi yahaniniyi, nakumona neyi nayiliku hambidi. Amudizishili muShikola Yawakwakushimwina nimuShikola yaMudimu wawuPayiniya. Yena niñodindi anafumi katataka hakudiza kuShikola Yawakwakushimwina Nsañu Yayiwahi yaWanta. Hampinji yimunakumusakilila manakwetu hampanji yinahoshiyi chiwahi, mukutoñojoka hayuma yejima yayidizishañawu antu jaNzambi.

Bayibolu yashimwineñahu dehi mpinji yamba ‘kayidizishawu antu jaNzambi kudi Yehova.’ (Isa. 54:13) Tunakushakama muniyi mpinji. Bayi neyi atudizishaña hohu kuhitila munyikanda yetuku, ilaña atudizishaña kuhitila mukupompa kwachipompelu, kupompa kwanyanya nikupompa kwamaneni nimashikola amakwawu aloñeshawu kulonda atukwasheña kuzata nyidimu yadimena mukuloñesha kwaYehova. Muchinu chibalu, tukushinshika awa mashikola ejima chiyanakumwekesha nawu Wanta waNzambi wunakuyuula makonu.