MAMS-Y y yamẽ: Yãmb tigingã bi-bɩɩg n sõsd zãma wã taoor tigis-kãseng sasa. Yaa a pipi la woto. Yãmb zẽka y neng n ges-a, n yõgemd y noore. Yãmb sẽn zĩ n kelgd a sõsgã, y wa n tagsa Wẽnnaam nin-buiidã sẽn paamd minim la bãngr ningã yelle. Y tẽega bi-bɩɩgã sẽn na n sõs pipi yãmb tigingã pʋgẽ wã, n neẽ t’a maana modgr hal tɩ pa wõnd yaa yẽ ye. A sɩd paama zãmsg sõma. A sɩnga ne Wẽnnaam tʋʋmdã lekolle. Rẽ poore, a kẽnga So-pakrã tʋʋmd lekolle. Sẽn nan pa kaoose, yẽ ne a pagã paamame n kẽng Rĩungã koe-moondb lekolle. A sẽn sa tɩ kɛlgdbã wẽed nu-pogsã, y zẽka y neng n karg zĩig fãa, n tags Wẽnnaam sẽn sõngd a nin-buiidã tɩ b paamd minim la bãngr ningã yelle.

Biiblã ra reng n togsame tɩ wakat n wat tɩ Wẽnnaam nin-buiidã fãa na n yɩ ‘a Zeova karen-biisi.’ (Ezai 54:13) Yaa wakat kãng la tõnd sẽn be wã. Pa ne sɛbã maasem bal la d paamd zãmsg ye. D tara tigissi, la tigis-kãsemse. D leb n tara lekoll toɛy-toɛy sẽn sõngd a Zeova siglgã neb sãnda tɩ b tõe n tʋm tʋʋm kẽere. Sags a yiibã sẽn pʋgdã pʋgẽ, d na n yãame tɩ woto fãa yaa kaset tɩ Wẽnnaam Rĩungã Rĩm rɩta naam.