O MYEMYELA ka lethabo ge seboledi seo se lego sethaleng se dutše se nea polelo. Ke ngwanabo rena yo mofsa go tšwa phuthegong ya geno, gomme o nea polelo ya gagwe ya mathomo kopanong. Ge o dutše o theeditše polelo ya gagwe, o ikwa o thaba le go makatšwa ke tlwaetšo yeo batho ba Modimo ba e hwetšago. O gopola polelo ya gagwe ya mathomo phuthegong ya geno gomme o lemoga tšwelopele e kgolo yeo a e dirilego! O ile a dira tšwelopele e kgolo kudu ka morago ga go tlwaetšwa Sekolong sa Tirelo ya Bobulamadibogo. Morago bjale, yena le mosadi wa gagwe ba thabetše go ba gona Sekolong sa Baebangedi ba Mmušo. Ge o dutše o opa magofsi ka morago ga polelo e matla ya ngwanabo rena yo, o lebelela batheetši go go dikologa gomme wa nagana ka thuto yeo batho ba Modimo ka moka ba e hwetšago.

Beibele e boletše e sa le pele ka nako yeo ka yona batho ba Modimo ka moka ba tlago go ‘rutwa ke Jehofa.’ (Jes. 54:13) Re phela nakong yeo. Ga re hwetše thuto ka dikgatišo tša rena feela eupša re e hwetša le ka diboka tša rena, dikopano tše dikgolo le tše dinyenyane gotee le ka dikolo tše di fapafapanego tšeo di hlametšwego go re thuša go phetha dikabelo tše itšego ka mokgatlong wa Jehofa. Karolong ye, re tlo ahlaahla kamoo thuto yeo e neago bohlatse bjo matla bja gore Mmušo wa Modimo o a buša lehono.