ƐYƐ ɛ nloa anwo monvoo ɛkile tendɛvolɛ ne mɔɔ gyi bama ne azo la. Ɔle adiema kpavolɛ mɔɔ wɔ wɔ asafo ne anu, na ɔlɛyɛ ye nyianu bo gyimalilɛ mɔɔ lumua. Ɛlɛtie ye ɛdendɛlɛ ne la, akee ɛnwu ye kɛ ndetelɛ mɔɔ Nyamenle azonvolɛ nyia la yɛ azibɛnwo. Ɔmaa ɛkakye kpavolɛ ɛhye gyimalilɛ mɔɔ lumua wɔ bama ne azo la​—na akee nea anyunluhɔlɛ mɔɔ yenyia la! Ɔwiele Adekpakyelɛ Ɛzonlenlɛ Sukulu ne la, akee ɔnyianle anyuhɔlɛ kpole. Ɔ nee ɔ ye nyianle nwolɛ adenle hɔle Belemgbunlililɛ Edwɛkpakavolɛma Sukulu ne bie kenlensa ye. Mekɛ mɔɔ ɛlɛbɔ ɛ sa nu wɔ ye ɛdendɛlɛ kɛnlɛma ne anwo la, akee ɛtoto ɛ nye na ɛdwenle ndetelɛ mɔɔ Nyamenle menli kɔsɔɔti nyia la anwo.

Baebolo ne hanle mekɛ bie mɔɔ ‘Gyihova bahilehile’ Nyamenle menli la anwo edwɛkɛ. (Aye. 54:13) Yɛde zɔhane mekɛ ne anu. Tɛ yɛ mbuluku ne mɔ anu angome a yɛnyia ndetelɛ a, emomu yɛ debiezukoalɛ, nyianu nee sukulu ngakyile mɔɔ bɛziezie kɛ bɛfa bɛatete yɛ bɛamaa gyimalilɛ titile bie mɔ wɔ Gyihova ahyehyɛdeɛ ne anu la. Wɔ foa ɛhye anu, yɛbazuzu daselɛ mɔɔ kile kɛ sukulu ɛhye mɔ da ye ali kɛ Nyamenle Belemgbunlililɛ ne ɛlɛdi tumi ɛnɛ la anwo.