ALAGHGA gumor ugen ken tiônnongo wou ngu nan kwaghôron na u hiihii sha mkohol u kiriki. Er anmgbian ne a lu lamen sha tsembe la, doo u, tsô u se teghelee. Er u lu ungwan kwaghôron na i lu doon we la, alaghga kpiligh we iyol sha ityesen i ior mba Aôndo ve lu zuan a mi la. U hide u umbur er gumor ne yange hii nan kwaghôron na u hiihii sha tsembe ve lu kunden ikyarkyase yô, man er a fe kwaghôron hegen kpishi yum yô! A za Makeranta u Henen Tom Pania la, nahan a seer zuan a mfe kpishi. Heela tseegh ga, a sember zan Makeranta u Mbapasen Ivangeli i Tartor vea kwase na. Er anmgbian ne a ne kwaghôron a bee, i lu kuren ave sha kwaghôron u acivin u a ne la, u gema u kenger ikpela i ior mba Aôndo mba ve ve mkohol shon la, u ngu henen sha ityesen i ve lu zuan a mi la.

Bibilo tsengaôron kwagh u shighe u ior mba Aôndo cii, vea lu ior “mba [Yehova] A tese ve” yô. (Yes. 54:13) Se mba ken shighe shon hegen. Ka ken ityakerada yase tseegh i tesen se ga, mba tesen se ken mbamkombo asev man mbamkohol mba kiriki kua mba vesen shi mba tsaase se ken imakeranta i í eren sha u wan se agoyol sha ci u ityom i ken nongo u Yehova la. Ken vegher u takerada ne u sha 5 ne, se lu nengen er ityesen ne cii i lu ikyav i tesen tseer tseer ér Tartor u Aôndo ngu hemen nyian yô.