OHƆSA dia wɛ ekɔ lo mɔnamɔna etena katɛkɛta ɔtɛkɛtshi lo lɔyɛnga. Nde ekɔ ɔnangɛso l’ɔlɔngɔlɔngɔ la l’etshumanelo kayɛ, ndo ɔsɔ mbele mbala kande ka ntondo ka mbisha sawo lo losanganya la woke. Wɛ ambɔngɛnangɛna sawo diande woho w’anyanya, ndo ambambiyama lo menda olowanyelo walongola ekambi waki Nzambi. Wɛ ambohɔ welo wakandadjaka lam’akandatatɛ mbeta lo lɔyɛnga ndo woho wayande ɛlɔ kɛnɛ. Nde akasale ehamelo efula l’ɔkɔngɔ wa nde mbɔtɔ lo Kalasa k’olimu wa teokrasi ndo oma laasɔ, lo Kalasa k’ambatshi mboka. Atete edja kele nde la wadɛnde wakɔtɔ lo Kalasa k’esambisha wa Diolelo. Etena kadanyu nsaka l’ɔtɛ wa sawo dia lɔɔka sɔ, wɛ ambɔkɛsakɛsa anto wokodingi ndo ambotatɛ nkanyiya lo kɛnɛ kendana la wetshelo walongola ekambi waki Nzambi tshɛ.

Bible kakatatshi dia l’etena kɛmɔtshi, ekambi tshɛ waki Nzambi “wayetshama le [Jehowa].” (Is. 54:13) Tekɔ lo nsɛna l’etena kɛsɔ. Tekɔ lo nongola wetshelo, aha tsho oma lo tshimbo y’ekanda, koko ndo lo tshimbo ya nsanganya ya l’etshumanelo, nsanganya ya weke, ndo ya kalasa yotshikitanyi yakalɔngɔswama dia tokimanyiya dia sho mɛmba ɛkɛndɛ aso wa l’okongamelo wa Jehowa dimɛna. Lo etenyi kɛnɛ, tayɛna woho wɛnya wetshelo ɛsɔ tshɛ dia Diolelo diaki Nzambi diekɔ lo mbolɛ.