E FAKAMISIKATA atu koe ki te failauga i te tulaga. A ia se taina talavou mai i tau fakapotopotoga, kae ko fai ne ia tena lāuga muamua i se fono. I te taimi e fakalogologo ei koe ki tena lāuga, e ofo malosi koe i fakamasaniga e maua ne tino o te Atua. E masaua ne koe a te taumafaiga muamua a te talavou tenei mai i luga i te tulaga​—kae lavea atu ne koe tena gasolo malosi atu ki mua! Ne gasolo malosi eiloa tou tagata ki mua mai tua o tena kauatuga ki te Akoga mō Paenia. Nei la, ne fia‵fia eiloa tou tagata mo tena avaga ke ‵kau atu ki te Akoga mō Tino Talai o te Malo. I te taimi e patipati ei a lima ki te lāuga gali a te taina, e kilokilo atu koe ki ou tafa kae mafaufau ki akoakoga e maua ne tino katoa o te Atua.

Ne ‵valo mai te Tusi Tapu me e isi se taimi ka “akoako ne [Ieova]” ana tino katoa. (Isa. 54:13) Ko ola nei tatou i te taimi tenā. E se maua fua ne tatou a akoakoga i ‵tou tusi, kae e auala foki i ‵tou fakatasiga, fono, fono o atufenua, mo akoga kese‵kese kolā ne fai ke fakatoka ei tatou mō galuega kese‵kese i te fakapotopotoga a Ieova. I te vaega tenei, ka mafau‵fau tatou ki te auala e tuku mai ei ne akoakoga katoa konei a fakamaoniga ‵mautakitaki me ko pule mai te Malo o te Atua i aso nei.