MADIRAKIYAN eqqidi tamaarissiyaagaa beˈada moocu gaasa. I gita shiiquwan baassi imettida koyro kifiliyaa shiishshiya ne gubaaˈiyan deˈiya yelaga ishaa. Neeni a haasayan ufayttaydda Xoossaa asay loohissanawu tamaarissiyooban maalaalettaasa. Ha yelaga ishay koyro shiishshido kifiliyaa hassayaasa; haˈˈi i ayyaanaaban keehi dicciis! I Aqinyetettaa Haggaazuwaa Timirtte Keettan tamaari simmid ayyaanaaban keehi dicciis. Mata wode inne a machiyaa Kawotettaa Mishiraachuwaa Yootiyaageeti Tamaariyo Timirtte Keettan tamaaridosona. Ishay shiishshido loˈˈo haasayawu kushiyaa baqqaydda, yuushsha aatta xeellada Xoossaa asay ubbay tamaariyoobaa qoppaasa.

Geeshsha Maxaafay Xoossaa asaa ubbaa “GODAI tamaarissana” wodee yaanaagaa kasetidi yootiis. (Isi. 54:13) Nuuni deˈiyoy he wodiyaana. Nuuni xuufetu xallan gidennan, gubaaˈe shiiqotun, gita shiiqotun, qassi Yihoowa dirijjitiyan nuussi imettiya oosuwaa polanawu giigidaageeta gidana mala nuna maaddiya dumma dumma timirtte keettatunkka tamaaroos. Ha tamaariyo ubbabay ha wodiyan Xoossaa Kawotettay haariiddi deˈiyoogaa waatidi qonccissiyaakko, nuuni ha shaahuwan beˈana.