SEKSYON 5
Edukasyon Mahitungod han Ginhadian—Pagbansay ha mga Sumurunod han Hadi
NALIPAY ka han nakita mo an mamumulong ha plataporma. Han bata pa hiya, kakongregasyon mo hiya, ngan yana nagpipresenta na hiya han iya siyahan nga bahin ha asembleya. Samtang namamati, diri mo mapugngan an imo kalugaringon ha pag-apresyar han pagbansay nga nakakarawat han katawohan han Dios. Nahinumdoman mo an siyahan nga bahin hini nga bugto. Daku na gud an iya pag-uswag! Nabansay hiya ha Teokratiko nga Eskwelahan ha Ministeryo, katapos ha Pioneer Service School. Ngan hinin bag-o la, hiya ngan an iya asawa naggradwar ha School for Kingdom Evangelizers. Samtang napakpak tungod han maopay nga bahin han bugto, iginlibot mo an imo pagkita ha mga kabugtoan ngan napamalandong an pagbansay nga nakakarawat han katawohan han Dios.
An Biblia nagtagna hin panahon diin an ngatanan nga katawohan han Dios magigin ‘natutdoan ni Jehova.’ (Isa. 54:13) Yana na ito nga panahon. Nakarawat kita hin edukasyon diri la pinaagi han aton publikasyon kondi pinaagi liwat han mga katirok, asembleya, kombensyon, ngan iba-iba nga eskwelahan nga gindisenyo ha pag-andam ha aton para hin partikular nga toka ha organisasyon ni Jehova. Hini nga seksyon, paghihisgotan naton kon paonan-o ito nga edukasyon nagtatagana hin marig-on nga ebidensya nga nagmamando na yana an Ginhadian han Dios.
HINI NGA SEKSYON
KAPITULO 16
Pagkatirok Para ha Pagsingba
Paonan-o kita makakapahimulos hin bug-os tikang ha aton mga katirok ha pagsingba kan Jehova?
KAPITULO 17
Pagbansay ha mga Ministro han Ginhadian
Paonan-o an teokratiko nga mga eskwelahan nabulig ha mga ministro han Ginhadian ha pagtuman han ira mga toka?