AWANICISYE kuti akum’wona m’bale ali mkuŵeceta ngani pa pulatifomu. Jwalakwe ali m’bale jwacinyamata jwakutyocela mumpingo wawo. Wawojo akusangalala kum’wona m’baleju ali mkuŵeceta ngani jakwe jandanda pamsongano wamkuli. Pakusangalala ni ngani jakweji, yikwatendekasya kumbucila majiganyo gakusapocela ŵandu ŵa Mlungu. Akukumbucila ndaŵi jandanda jele m’baleju ŵaŵecete ngani jakwe ni akuyiwona kuti apano akusisye lunda lwakwe lwakwiganya. Yeleyi yikombolece ligongo lyakuti jwajinjile Sukulu ja Undumetume wa Upayiniya. Pamkaŵapasoni jwalakwe ni ŵamkwakwe ŵajinjile Sukulu ja Ŵakulalicila ya Ucimwene. M’yoyo, pakumgombela m’miyala m’baleju ligongo lya ngani jakwe jakupikanika ceneneji, akwalolecesya abale ni alongo ni yikwatendekasya kuganicisya ya majiganyo gakusapocela ŵandu wosope ŵa Mlunguga.

Baibulo jasasile mkanipaŵe ya ndaŵi jele ŵandu wosope ŵa Mlungu ‘tacijiganyidwa ni Yehofa.’ (Yes. 54:13) Apano tuli mundaŵi jakwiganyidwa ni Yehofa. Ngatukusapocela majiganyoga kupitila m’mabukupe gakusala ya m’Baibulo, nambo kupitilasoni m’misongano jampingo, jamkuli soni jaupande. Tukusapocelasoni majiganyoga kupitila mu sukulu syele cakulinga cakwe cili kutukosecelesya kutenda maundumetume gane m’likuga lya Yehofa. Mumbali ajino, citulole umboni wamacili wakulosya kuti Ucimwene wa Mlungu ukulamulila masiku agano kupitila m’majiganyoga.