JAATS 5
Le kaʼansaj ku tsʼáaik le Reinooʼ: Ku kaʼansaʼal le máaxoʼob u tsʼaamubaʼob tu tséel le Reinooʼ
KEN a pakt le máax ku máansik u tsoltʼaanoʼ ku kiʼimaktal a wóol. Letiʼeʼ ta múuchʼulil u taal yéetel yáax u máan tiʼ junpʼéel asambleaoʼ. Yoʼolal bix jatsʼutsil u máansik le tsoltʼaanoʼ ku joʼopʼol a tuukul tiʼ le maʼalob kaʼansaj ku kʼamik le máaxoʼob meyajtik Diosoʼ. Ku kʼaʼajaltech le ka tu yáax máansaj u tsoltʼaan ta múuchʼuliloʼ yéetel ka tsʼáaik cuenta jach yaʼab baʼaxoʼob tsʼoʼok u kanik. Tsʼoʼoleʼ maas kaanbalnaj ka bin teʼ Escuela utiaʼal Precursoroʼoboʼ. Maʼ sen úucheʼ bin yéetel u yatan teʼ Escuela utiaʼal le Máaxoʼob Kʼaʼaytik le Reinooʼ. Ken tsʼoʼokok le tsoltʼaanoʼ ku joʼopʼol a paakat ta baʼpach le táan le papaxkʼaboʼ yéetel ka tuukul tiʼ le maʼalob kaʼansaj ku kʼamik le máaxoʼob meyajtik Diosoʼ.
Le Bibliaoʼ u yaʼalmeʼ yaan u kʼuchul u kʼiinil u kaʼansaʼal le máaxoʼob meyajtik Jéeobaoʼ. Letiʼeʼ ku yaʼalik: «Teneʼ bíin in kaʼanbes tuláakal a paalal» (Isa. 54:13). Bejlaʼeʼ táan k-ilik u béeytal le tʼaanoʼobaʼ. Jéeobaeʼ ku kaʼanskoʼon yéetel le jóoʼsaʼaniloʼoboʼ, le muchʼtáambaloʼoboʼ, le asambleaʼoboʼ bey xan yéetel le jejeláas escuelaʼob tuʼux ku kaʼansaʼaltoʼon ka k-beet wa baʼax meyajiloʼ. Teʼ jaatsaʼ yaan k-ilik bix le kaʼansaj ku tsʼáaik u kaajal Diosoʼ ku yeʼesik táan u gobernar le Reino teʼ kʼiinoʼobaʼ.
BAʼAX YAAN TEʼ JAATSAʼ
XOOK 16
Muchʼtáambaloʼob utiaʼal k-adorartik Dios
¿Bix jeʼel k-jóoʼsik u yutsil le muchʼtáambaloʼob tuʼux ku adorartaʼal Jéeobaoʼ?
XOOK 17
Le bix u kaʼansaʼal le máaxoʼob kʼaʼaytik le Reinooʼ
¿Bix tsʼoʼok u yáantaʼal le sukuʼunoʼob tumen le escuelaʼob utiaʼal u beetkoʼob tubeel u meyajoʼoboʼ?