FÃ 6
Matsɛ Yemi ɔ Se Fimi—Tsu Mami Kɛ Ha Mawu Jami Kɛ Yemi Kɛ Buami Ngɛ Oslaa Be Mi
O YA nyɛ Matsɛ Yemi Asa a nɔ, nɛ o na kaa lejɛ ɔ tsake kulaa. O bua jɔ nyɛ Matsɛ Yemi Asa a he saminya. Eko ɔ, o kai benɛ o ye bua nɛ a kɛ ma Asa a jeha komɛ nɛ be ɔ. Se amlɔ nɛ ɔ, o bua jɔ wawɛɛ ejakaa a kɛ Matsɛ Yemi Asa a ma tsu ní be bɔɔ kɛ ye bua nihi nɛ oslaa ná mɛ. Lingmi nɛ ɔ, hiɔmi kɛ ahumi puɛ ní ngɛ kpokpa a nɔ. Oya nɔuu nɛ Asafo ɔ Ní Tsumi Kɔni Ajla Toli ɔmɛ to blɔ nya konɛ nihi nɛ oslaa ba a nɔ ɔ nɛ a ná niye ní, tade, nyu, kɛ ní kpahi nɛ he maa hia mɛ. A to níhi nɛ nyɛmimɛ je a suɔmi mi nɛ a kɛ ba ha konɛ a kɛ ye bua nihi nɛ oslaa ná mɛ ɔ nya saminya ngɛ Matsɛ Yemi Asa a nɔ. Nyɛmimɛ nyumuhi kɛ yihi nɛ oslaa ná mɛ ɔ ba ngɛ níhi nɛ hia mɛ ɔ ngɔe, nɛ a bua jɔ.
Yesu tsɔɔ kaa nɔ́ titli nɛ a kɛ maa le e se nyɛɛli ji suɔmi nɛ a ngɛ kɛ ha a sibi ɔ. (Yoh. 13:34, 35) Ngɛ fã nɛ ɔ mi ɔ, wa ma susu bɔ nɛ tsuhi nɛ Yehowa Odasefohi ma, kɛ yemi kɛ buami nɛ a kɛ ha a nyɛmimɛ nɛ oslaa ná mɛ ɔ tsɔɔ kaa a suɔ a sibi ɔ he. Suɔmi nɛ wa jeɔ kpo ɔ ji odase nitsɛ nɛ tsɔɔ kaa wa ngɛ Yesu Matsɛ Yemi ɔ sisi.
NGƐ FA NƐ Ɔ
YI 18
He Nɛ Wa Náa Sika Ngɛ Kɛ Tsuɔ Matsɛ Yemi ɔ Ní Tsumihi
Jije a náa sika ngɛ? Mɛni a kɛ sika a peeɔ?
YI 19
Tsu Mami Ní Tsumi Nɛ Woɔ Yehowa Hɛ Mi Nyami
He nɛ a jaa Mawu ngɛ ɔ woɔ e hɛ mi nyami, se nɔ́ kpa hu ngɛ nɛ e he hia lɛ saminya.
YI 20
Yemi Kɛ Buami Ní Tsumi ɔ Woɔ Yehowa Hɛ Mi Nyami
Kɛ wa pee kɛɛ kɛ le kaa yemi kɛ buami ní tsumi ɔ piɛɛ wa Mawu jami nɛ ngɛ klɔuu ɔ he?
