6 JALJA
Diosan Reinopar yanaptʼaña: Diosar yupaychañatak utanak luraña ukat jilat kullakanakar yanaptʼaña
TANTACHASIÑ Uta uñkatasajj wal kusistajja. Utachasiñapatakejja, kunjamsa mä qawqha maranak nayrajj yanaptʼawayta ukwa amtastajja. Jichhajj jan walin uñjasipki uka jilat kullakanakaruw mä qawqha tiempojj ukan yanaptʼasini, uk uñjasajj jukʼampiw kusistajja. Markamanjja, thayamp jallumpiw kunayman jan waltʼäwinak utjayawayi. Ukatwa Sucursal Sarayirinakajja, ukan jakasir jilat kullakanakar uma, manqʼa ukat yaqha ukham yanaptʼanak jankʼak apayañatak chʼamachasiwayapjje. Ukanakajja, Tantachasiñ Utaruw puriyasiwayi ukat lakirañatakejj suma waktʼayatäjjarakiwa. Ukanak katoqañatakiw jilat kullakanakajj filasisipki ukat waljanejj kusisiñatsa jachaqtʼasipjjewa.
‘Maynit maynikam munasirïpjjatapatwa arkirinakajarojj uñtʼasini’ sasaw Jesusajj säna (Juan 13:34, 35). Diosar yupaychañatak utanak lurasa ukat jan waltʼäwin uñjasipki ukanakar yanaptʼasajja, kunjamsa jilat kullakanakajj cristianjam munasirïpjjatap uñachtʼayapjje, ukwa aka jaljan yatjjataskañäni. Cheqansa, jupanakajj kunja munasirïpjjesa uk uñjasaw Jesusan Reyjam apnaqjjatap yattanjja.
AKA SECCIONANJJA AKA YATICHÄWINAKAW UTJI
18 YATICHÄWI
Kuna qollqempis Reinon luräwinakapajj apasi
¿Kawkitsa qollq apsupjje? ¿Kunatakis uka qollqejj irtasi?
19 YATICHÄWI
Jehová Diosar jachʼañchir utanaka
Diosar yupaychañatak utanakajj Juparuw jachʼañchi, ukampis ¿kunas Diosatakejj jukʼamp askïpacha?
20 YATICHÄWI
Mayninakar yanaptʼasaw Diosar yupaycharaktanjja
Jan waltʼäwin uñjasipki ukanakar yanaptʼasaw Diosar serviraktanjja sasajja, ¿kunatsa sissna?