PAGLAOG mo sa Kingdom Hall nindo, haros dai mo na iyan mamidbid. Ipinag-oorgulyo mo pirmi an edipisyong iyan. Tibaad may mauugma ka pa nganing nagigirumduman kan magtabang ka sa pagtugdok kaiyan mga pirang taon na an nakaagi. Pero mas ipinag-oorgulyo mo pa ngani iyan ngunyan, huli ta ginibo iyan na temporaryong sentro sa pagtao nin ayuda. Pagkatapos nin baha saka grabeng distroso sa lugar nindo huli sa dai pa sana nahahaloy na bagyo, nag-organisar tulos an Branch Committee nin paagi na matawan nin kakanon, bado, malinig na tubig, asin iba pang tabang an mga biktima kan kalamidad. Areglado an pagkakamada kan idinonar na mga ayuda. Nakapila an mga tugang para magkua nin pangangaipo ninda, asin dakul sa sainda an nagpapahid nin luha huli sa kagaya-gayahan.

Sinabi ni Jesus na mamimidbid nanggad an mga parasunod niya paagi sa pagkaminuruot-muutan. (Juan 13:34, 35) Sa seksiyon na ini, pag-uulayan ta kun paano ipinapahiling an Kristiyanong pagkamuot sa mga proyekto nin pagtugdok asin pagtao nin ayuda na ginigibo kan Mga Saksi ni Jehova. An siring na pagkamuot makusog nanggad na ebidensiya na kita pinamamahalaan na kan Kahadian ni Jesus.