ELENGANYENI ukuti mwalikwata Ing’anda ya Bufumu iyo mwatemwa sana. Nalimo mwalyafwilisheko no kukuula. Nomba bushiku bumo ku ncende uko mwikala kwapona ubusanso ubukalamba icine cine. Imfula yaloka sana yaonalula ne fintu ifingi. Cilya mwaya pa Ng’anda ya Bufumu mwasanga ifintu na fyaluka icine cine. Komiti ya Musambo iya mu calo cenu naituma ifya kulya, ifya kufwala, amenshi ya kunwa ayasuma, no bwafwilisho bumbi. Cilya mwaingila mu kati mwamona na batantika bwino sana ifya kupeela abasanshilwe kabili mwasanga bamunyina na bankanshi abengi balepoka ifyo balekabila ninshi bambi balekumuna ne filamba ku nsansa. Ukwabula no kutwishika kuti mwatemwa sana imilimo iilebombwa mu Ng’anda ya Bufumu.

Yesu atile icikalamba ico abasambi bakwe bakalabeshibilako kutemwana. (Yoh. 13:34, 35) Muli cino cipande twalalanda pa fyo umulimo wa kukuula no kwafwa abaponenwe na masanso ulanga ukuti Inte sha kwa Yehova balitemwana nga filya fine Yesu alandile. Ukutemwana kwa musango uyu bushininkisho bwa kuti tutekwa no Bufumu bwa kwa Yesu.