YU KAM insaed long Haos Kingdom mo yu lukluk evri samting raonabaot long yu. Oltaem yu yu glad tumas blong kam long ples ya. Yu tingbaot we plante yia bifo yu bin givhan blong wokem haos ya. Be naoia yu glad moa, from we yu luk se oli stap yusum Haos Kingdom blong mekem wan spesel wok blong smoltaem. Wan bigfala hariken mo ren i jes spolem ples blong yufala, nao Haos Kingdom ya i kam stamba ples blong putum ol samting we ol man oli nidim. Kwiktaem nomo, Branj Komiti i mekem plan se ol brata mo sista we oli trabol from kakae, mo klos, mo klin wota, mo ol narafala samting, bambae oli kam long ples ya. Ol samting we ol brata oli givim i stap finis long Haos Kingdom, nao olgeta we oli nidim oli stap kam karem. Plante long olgeta oli stap ravemaot wota blong ae blong olgeta, from we oli glad tumas.

Jisas i talem se ol man blong hem bambae oli lavlavem olgeta. Fasin ya nao bambae i makemaot olgeta se oli man blong hem. (Jon 13:34, 35) Long haf ya, bambae yumi tokbaot olsem wanem ol Witnes blong Jehova oli soemaot se oli lavlavem olgeta, taem oli bildim ol niufala haos wosip, mo taem oli givhan long olgeta we oli trabol from disasta. Samting ya i soemaot gud se oli stap aninit long rul blong Kingdom finis.