NGATU tje ove mo hiti mEtuwo reṋu rOmerikotameneno nu oruveze ndwi maru munika omuano warwe. Nu indwi oruveze ndu ku tjatera tjinene. Ove mape ya u zemburuka oviṋa oviwa mbya tjitirwa petuwo ndi indu tjoo vatere momatungiro waro ozombura nḓa kapita. Posi yokutja nai mo tjaterwa tjinene mena rokutja Etuwo rOmerikotameneno mari ungurisiwa kokueta ombatero ku imba mba wirwa i oumba. Ousupi tji pa za nokutjitwa otjisukusuku tji tja eta omipupo nonyoneno momaturiro weṋu, Okomiti yOrutavi rwOmberoo ya hakahana okurongerisa omiano vyokuvatera kutja imba mba wirwa i oumba ve mune ovikurya, ozombanda, omeva omakohoke nombatero yarwe. Oviyandjewa vyokuvatera moumba mbwi vya tuwa nawa poruveze rumwe. Nu ovakambure ovakweṋu mave rauka metuwo okuyekutoora oviṋa mbi mave hepa, tjiva amave riyeka omahoze wondjoroka.

Jesus wa tja otjiṋa tji matji tjiukisa ovakarere ve ma rire orusuvero ndu ve raisa kovakwao. (Joh. 13:34, 35) Morupa ndwi, matu katara korusuvero rwOukriste ndu raisiwa i Ovahongonone vaJehova poviungura vyokutunga noviungura vyokuvatera imba mba wirwa i oumba. Orusuvero otja indo otjiraisiro otjinamasa tjokutja tu hupa kehi yOuhona waMukuru mbu honaparerwa i Jesus.