ABỌ AVỌ 6
Uketha nọ A be rọ Kẹ Uvie Na—Ẹbọ Iwou Egagọ gbe Obufihọ nọ Okpẹtu Ọ tẹ Romavia
NỌ WHỌ rueva Ọgwa Uvie rai, o tẹ wọhọ nọ who gbe bi vuhu iei hi. Ẹsikpobi Ọgwa Uvie nana ọ rẹ were owhẹ. O sae jọnọ whọ be hae kareghẹhọ okenọ whọ rọ jọ Ọgwa Uvie na ru iruo evaọ okenọ a jẹ bọe ikpe jọ nọ i kpemu. Rekọ obọnana Ọgwa Uvie na ọ be were owhẹ vi epaọ anwẹdẹ nọ a zihe iei ruọ oria nọ inievo nọ okpẹtu ọ via kẹ a rẹ dhẹ ze a wo ufuoma na, dede nọ ọruẹrẹfihotọ nana ọ te jọ ubroke. Nọ owhe jọ o ku nọ ọ raha eware evaọ okegbe ra, Ogbẹgwae Uwou-Ogha u te ru ọruẹrẹfihotọ ẹsiẹsiẹ epanọ inievo nọ okpẹtu na o te oma na a sai ro wo emu, iwu, emamọ ame, gbe oghẹrẹ obufihọ ofa. A tẹ nabe ruẹrẹ eware nọ a zọhọ ze na họ evaọ Ọgwa Uvie na kpatiẹ. Inievo-emezae gbe inievo-emetẹ nọ okpẹtu ọ via kẹ na a te dhuhie họ be tọlọ ọvuọ ọriẹ, yọ irui oghọghọ i bi su no ejọ aro ze.
Jesu ọ ta nọ uyoyou nọ ilele riẹ a re wo kẹ ohwohwo a ti ro vuhu ae. (Jọn 13:34, 35) Evaọ abọ nana, ma te ta kpahe epanọ Isẹri Jihova a bi ro dhesẹ uyoyou yena evaọ iruo ebabọ Egwa Uvie gbe obọ nọ a bi fihọ kẹ otu nọ okpẹtu o te oma. Uyoyou utioye na o kẹ imuẹro gaga inọ otọ esuo Uvie Jesu ma ginẹ rrọ.
ENỌ E RRỌ OFẸ NANA
UZOU AVỌ 18
Oghẹrẹ nọ Ma be rọ Ruẹ Ugho Ru Iruo Uvie Na
Diẹse ugho na u bi no ze? Kọ eme a be rehọ iẹe ru?
UZOU AVỌ 19
Iruo Ebabọ nọ E be Wha Orro Se Jihova
Iwou egagọ e be wha orro se Ọghẹnẹ, rekọ u wo oware ofa jọ nọ ọ be mai rri ghaghae.