NATU tye nee ngeno oshitukulwa sheni osha dengwa koshikungulu shodula osho sha hanauna po filufilu oinima. Eshi wa ya kOlupale leni lOuhamba, ito hale okwiitavela kutya olo ngoo. Owa kala u udite etumba omolwolupale olo, tashi dulika ho dimbuluka nehafo omido da pita eshi wa li to kwafele pefimbo lokutungwa kwalo. Ashike paife ou udite nokuli etumba shi dulife nale, molwaashi ola ninga onhele yopakafimbo yokuyandjela oikwafa. Konima yoshikungulu osho, Okomitiye yOshitaimbelewa oya ninga po diva omalongekido opo ovo va ninga oihakanwa va pewe oikulya, oikutu, omeva mayela nosho yo omakwafo amwe vali. Oikwafa oyo ya yandjwa omayambidido oya li ya pakelwa nawa molupule. Ovamwatate novamwameme ove uya molupale, nova pewa osho va pumbwa, navahapu ova li tava pololoka omahodi, tava lili kehafo.

Jesus okwa ti kutya ovashikuli vaye otava ka didilikwa mo unene tuu omolwohole yavo yokuholafana. (Joh. 13:34, 35) Moshitukulwa eshi, ohatu ka kundafana nghee hatu ulike ohole oyo yopaKriste tu li Eendombwedi daJehova okupitila moilonga yetu yokutunga nomeenghendabala detu dokuyandja oikwafa. Ohole oyo oi li oumbangi wa kola oo tau ulike kutya otu li koshi yOuhamba oo u li meke laJesus.