MWATWELA mu Nzubo ya Bufumu yenu ne kukumya pa byo ibena kumweka. Mumvwa bingi bulongo pa kwikala na kino kishimikwa. Kampe mwavuluka ne byo mwaingijileko pa kwiishimika pa myaka yapitapo. Luno muji bingi na lusekelo mambo Nzubo ya Bufumu po pa bena kufikila bipe bya kukwasha bantu baponenwa na bya malwa. Panyuma ya kinkunkwila kyalengejile kuyujilwamo ne konauna bintu byavula ko mwikela, Kavoto ka Musampi kanengezhejile baponejilwe mu ano malwa bya kuja, bya kuvwala, mema awama ne bintutu bikwabo. Byo bapana be binengezhezha jimo bulongo. Balongo ne banyenga babena kutantama kabiji babena kutambula byo babena kukeba, ne mipolo kuyengelela na mambo a lusekelo.

Yesu waambile’mba kintu kyo bakayukilako bantu banji ke kwitemwa bene na bene. (Yoano 13:34, 35) Mu kino kipungu, tusakufunda pa bena Kilishitu byo babena kumwesha butemwe kupichila mu mwingilo wa buntungi ne bukwasho bubena kupana Bakamonyi ba kwa Yehoba. Kumwesha butemwe mu jino jishinda kumwesha kuba’mba tulamwa na bukalama bwa Bufumu bwa kwa Yesu.