MAMS-Y wa yãmb sẽn na n ta Rĩungã roogẽ, tɩ nebã pidi. Pa le wõnd yaa Rĩung roog ye. Yãmb sũur da sɩng n nooma ne b sẽn me roogã t’a yaa to-to wã. Tõe meng tɩ y tẽra y sẽn sõng n maan bũmb nins a meebã sasa wã. La masã, y sũurã maneg n yaa noog ne Rĩungã roogã, bala nebã tigma be n na n paam sõngre. Sa-kãseng n ni, n naag ne seb-kẽeng hal n sãam bũmb wʋsgo. Tao-tao bala, Betɛllã maana a sẽn na maaneg tɩ nebã tõe n paam rɩɩbo, futu, koom la bũmb a taaba. B manega bũmb nins saam-biisã sẽn toolã n rʋʋs-rʋʋse, tɩ saam-biisã la saam-bi-pogsã tonge, tɩ ned kam fãa reegd sẽn yaa tɩlae ne-a wã. Wʋsgã nintãm yɩlsdame, b sũurã sẽn noom keelem.

A Zezi ra yeelame tɩ yaa nonglmã n na n kɩt tɩ b bãng a nin-buiidã n bake. (Zã 13:34, 35) Sags a tãabã sẽn pʋgdã pʋgẽ, d na n yãame t’a Zeova Kaset rãmbã sẽn met rot b tũudmã yĩnga, la b sõngd b taabã sabab-wẽns sasa wã wilgdame tɩ b sɩd nonga taaba. Nonglem ning d sẽn tarã yaa kaset t’a Zezi rɩta naam, tɩ tõnd yaa a naamã poorẽ dãmba.