OSHITOPOLWA 6
Okwaambidhidha Uukwaniilwa — Taya tungu omatungo gokulongelela mo Kalunga nokukwatha ooyakwawo
NATU tye nduno owe ya mOshinyanga shUukwaniilwa, ndele sho wa lengalenga, ino fa ootu we enda mo nale. Owa kala aluhe wu uvitile etungo ndyoka uuntsa. Otashi vulika nokuli to dhimbulukwa nenyanyu sho wa li to kwathele oku li tunga omimvo dhontumba dha piti. Ihe ngashingeyi sho mOshinyanga moka tamu gandjelwa iikwatha pakathimbo, oshi ku uvitithe ishewe uuntsa unene. Omathimbo opo ga yi sho oshikungulu sha kungulula po nosha hanagula po oshitopolwa sheni, Okomitiye yOshitayimbelewa oya ningi omalongekidho mbala, opo mboka ya ninga iihakanwa ya pewe iikulya, omizalo, omeya ga yela nomakwatho galwe. Iikwatha oya li ya tulwa nawa melandulathano. Aamwatate oye ya ya pewe shoka ya pumbwa, noyendji oya li taya lili kenyanyu.
Jesus okwa ti kutya ohole yokuholathana oyo tayi ka ndhindhilikitha mo aalanduli ye. (Joh. 13:34, 35) Moshitopolwa shika otatu ka tala nkene Oonzapo dhaJehova hadhi ulike ohole yopaKriste, sho tadhi tungu omahala gokulongelela mo Jehova naasho tadhi kwatha yalwe uuna ye li monkugo yi na onkambe. Ohole ndjoka otayi ulike lela kutya otatu lelwa komukwaniilwa Jesus.
MOSHITOPOLWA SHIKA
ONTOPOLWA 18
Nkene iilonga yUukwaniilwa hayi ambidhidhwa pashimaliwa
Oshimaliwa ohashi zi peni? Ohashi longithwa ngiini?
ONTOPOLWA 19
Okutunga hoka haku simanekitha Jehova
Omahala gokugongalela mo ohaga simanekitha Kalunga, ihe opu na shilwe shoka a lenga unene.
ONTOPOLWA 20
Okulongela Jehova okwa kwatela mo okukwathela mboka ya adhika kiiponga
Otu shi shi ngiini kutya okukwathela mboka ya adhika kuudhigu nako omukalo gwokulongela Jehova?