SOKA ñgeno ukahi nokunyingila Mondyuo yenyi Yomaliongiyo, mahi kukahi nokuiimbuka. Ove apeho uhambukwa unene tyina utala ondyuo oyo. Alo umwe hamwe uhambukwa tyina uhinangela menima yatungwa mokonda nove waundapelepo. Mahi pahe wahambukua vali mokonda Ondyuo Yomaliongiyo yapilululwa pala okukuatesako ovakuatate vavasiwa noviponga. Etyi kualoka ombila imwe onene nomphepo ainyono potyilongo tyove, Okomisau Yofiliyale ayonganeka liwa-liwa onkhalelo imwe yokukuatesako vana vatumbukilwa notyitateka otyo, mokuvepa okulia, nomivalo, nomaande asukuka, novipuka ovikuavo. Oviawa vialingwa, viaonganekwa nawa. Iya ovakuatate nonomphange, velionga omutete opo vatambule etyi vesukisa, ovikando ovinyingi, vatokesa ononkhuka mokonda yehambu.

Jesus wapopile okuti etyi tyiimbukisa vali unene ovanthu vae, ohole vena navakuavo. (João 13:34, 35) Monthele ei, matulilongesa oñgeni ohole Yovakristau italelwa kuetyi Onombangi mba Jeova vekahi nokulinga, okutunga onondyuo mbomaliongiyo, nokukuatesako vana vatumbukilwa noviponga. Ohole oyo, otyilekeso tyokuti tukahi nokutuminwa Nouhamba wa Jesus.