BO TA cana drenta bo Salon di Reino y casi bo no ta reconoce e luga. Semper bo tabata orguyoso di e edificio aki. Bo tin hasta grato recuerdo di tempo cu bo a yuda construye algun aña pasa. Pero awor bo ta mas orguyoso cu nunca di e Salon di Reino, ya cu nan a transform’e temporalmente den un centro di ayudo pa coordina trabounan di auxilio. Recientemente un horcan a causa inundacion y destruccion den bo area, y di biaha e Comite di Sucursal a organisa un manera pa e victimanan di desaster por haya cuminda, paña, awa limpi y otro yudansa. E articulonan cu e centro di ayudo a ricibi di donacionnan ta bon ordena. E rumannan ta drenta un tras di otro y ta haya loke nan tin mester. Hopi di nan ta yora di alegria.

Hesus a bisa cu nan lo reconoce su pueblo na e amor cu nan tin pa otro. (Juan 13:34, 35) Den e seccion aki nos lo bay mira con testigonan di Jehova ta demostra amor cristian den e proyectonan di construccion y durante e trabounan di auxilio. E muestra di amor aki ta un prueba convencente cu nos ta bibando bou di e Reinado di Hesus.