TANTAKUNA Wasita rikuspa yuyarikunki chayman may kusisqa risqaykimanta, chantapis ichá ruwakushajtin yanapakorqanki. Chaywanpis kunanqa, aswan kusisqaraj kashanki, imajtinchus jatun ñakʼariypi kajkunata chay tantakuna wasimantapacha yanapakushan. Chay lugarpi sinchʼita paraykusqanrayku yaku juntʼaykorqa. Comité de Sucursal nisqataj wakicherqa llakiypi tarikojkunaman usqhayllata mikhunata, pʼachata, yakuta, waj imastawan apachikunanpaj. Chaykunataj maychus kananpi churasqa kashan. Hermanosqa filapi kashanku necesitasqankuta japʼinankupaj. Ashkhasqa kusiymanta waqay ñawilla kashanku.

Jesusqa nerqa kamachisnin purajmanta munanakusqankurayku rejsisqa kanankuta (Juan 13:34, 35). Kay rakʼiypeqa yachakusun, tantakuna wasista ruwaspa, llakiypi tarikojkunata yanapaspa ima, Jehovaj testigosnin munakuyta rikuchisqanchejta. Chay jina munakoyqa, sutʼita rikuchin Jesuspa kamachiyninpi kausakushasqanchejta.