MO YEKE tambela na yâ ti Da ti Royaume ti mo na a yeke tongana ti kozo ape. Da so azia ngia lakue na bê ti mo. Peut-être mo dabe ti mo na ngia so mo wara lani na mungo mbage na lekengo ni ândö. Me ti fadeso, a kiri a zia ngia mingi na bê ti mo, ndali ti so Da ti Royaume ni aga ndo so, na yâ ni, a yeke mû maboko na azo na ngoi ti aye ti ngangu. Na ndo so mo yeke dä, kota ngu apika amû ndo kue na abuba aye mingi dä. Hio, Komite ti filiale aleke mbeni ye ti mû kobe, bongo, nzoni ngu ti nyongo ni nga na ambeni ye na azo so ye ti ngangu ni asi na ala. Aye so aita atokua ti mû na maboko na azo, a leke ni nzoni nga na lege ni. Aita-koli na aita-wali ayeke lï na molongo ti wara ye so ala yeke na bezoin ni. Mingi ti ala ayeke essuyé ngu ti lê ti nzerengo tere na lê ti ala.

Jésus atene lani so a yeke hinga adisciple ti lo mbilimbili na ndoye so ala yeke na ni na popo ti ala (Jean 13:34, 35). Na yâ ti mbage so, e yeke bâ tongana nyen la a yeke bâ ndoye so na yâ ti akua so e aTémoin ti Jéhovah e yeke sara ti leke ada nga ti mû maboko na azo na ngoi ti ye ti ngangu. Mara ti ndoye ni so ayeke mbeni kpengba ye so afa so e yeke na gbe ti komandema ti Royaume ti Jésus.