UNGENA eHholweni lenu leMbuso, futsi awusaliboni kahle. Bewuhlale usijabulela kakhulu lesakhiwo. Kungenteka uyasikhumbula sikhatsi lesimnandzi lowaba naso nawusita ekwakhiweni kwalo eminyakeni leyendlulile. Kodvwa nyalo ujabula kakhulu ngalo ngobe liHholwa leMbuso lakini selisetjentiselwa kunika lusito kwesikhashana. Ngemuva kwekutsi sangcotfo siletse tikhukhula futsi tibange umonakalo endzaweni yangakini, iKomidi Yeligatja ngekushesha ihlele kutsi bantfu labatsintsekako kulomonakalo batfole kudla, kwekwembatsa, emanti lahlobile nalolunye lusito. Tintfo letinikelwe letitawusetjentiselwa kusita, tihlelwe kahle. Bazalwane nabodzadze bangena ngebunyenti, batfola tintfo labatidzingako futsi esikhatsini lesinyenti bagcwala tinyembeti tenjabulo emehlweni abo.

Jesu watsi luphawu loluyinhloko lwebantfu bakhe bekutawuba lutsandvo labanalo kulomunye nalomunye. (Joh. 13:34, 35) Kulencenye sitawucoca ngendlela lutsandvo lwebuKhristu lolubonakala ngayo nakwakhiwa kanye nangesikhatsi BoFakazi BaJehova baletsa lusito. Lonkhe lolutsandvo lubufakazi lobukhulu bekutsi siphila ngaphansi kwekubuswa nguMbuso waJesu.