U YA eHolweni ya n’wina ya Mfumo naswona wo yi fanisela kunene. Minkarhi hinkwayo a wu tinyungubyisa hi muako lowu. U nga ha va u ri ni minkarhi yo tsakisa leyi u yi tsundzukaka ya loko u ri karhi u pfuneta eku yi akeni eka malembe lama hundzeke. Kambe, sweswi u tinyungubyisa swinene hi ndlela leyi Holo ya Mfumo yi hundzuriweke ndhawu ya mphalalo ya nkarhinyana. Endzhaku ka loko xidzedze lexi veke kona sweswinyana xi vange ndhambi exifundzheni xa ka n’wina, hi ku hatlisa Komiti ya Rhavi yi hlele leswaku vanhu lava weriweke hi mhangu va kuma swakudya, swiambalo, mati lama tengeke ni mpfuno wun’wana. Wu hleriwe hi vukheta mphalalo lowu vamakwerhu va wu nyikeleke. Vamakwerhu va ta va ta teka leswi va swi lavaka naswona minkarhi yo tala va ri karhi va xiririka mihloti ya ntsako.

Yesu u vule leswaku mfungho lowu xiyekaka wa vanhu vakwe a ku ta va ndlela leyi va rhandzanaka ha yona. (Yoh. 13:​34, 35) Eka xiyenge lexi hi ta tlhuvutsa ndlela leyi rirhandzu ra Vukreste ri kombisiwaka ha yona loko ku ri ni matsima yo aka ni matshalatshala lama endliwaka hi Timbhoni ta Yehovha leswaku ti pfuneta hi mphalalo. Swiendlo swoleswo hinkwaswo swa rirhandzu i vumbhoni lebyi nga ­erivaleni bya leswaku hi hanya ehansi ka Mfumo wa Yesu.