TIYELEZGERE kuti mukunjira mu Nyumba yinu ya Ufumu, kweni mukuwona nga ndiyo cha. Kwamba kale, yikumukondweskani nyumba iyi. Nakuti panji mukakondwa kuzengako. Kweni sono mwakondwa chomene chifukwa pa malo agha, ŵabali ŵinu ŵakupokelerapo wovwiri. Chimphepo na maji ghakututuka vyananga vinthu mu chigaŵa chinu. Ntheura Komiti ya Munthavi yanozga vyakuti awo ŵakhwaskika na suzgo iyi ŵapokere chakurya, vyakuvwara, maji, na vinyake. Katundu waŵikika makora mu Nyumba ya Ufumu. Ŵabali na ŵadumbu ŵakunjira na kupokera wovwiri uwu. Ŵanyake masozi ghakuthika chifukwa cha chimwemwe.

Yesu wakati chimanyikwiro chikuru cha ŵanthu ŵake ntchitemwa. (Yoh. 13:34, 35) Mu chigaŵa ichi tiwonenge umo Ŵakaboni ŵa Yehova ŵakulongolera chitemwa para ŵakuzenga malo ghakusoperapo na kovwira ŵanyawo pa suzgo. Chitemwa ichi mbukaboni wakuti Yesu wakuwusa.