A HAERE noa ˈi oe na roto i te Piha a te Basileia, ua taui roa teie vahi. Haapeu noa na hoi oe i teie piha, a haamanaˈo atoa ˈi i to oe apitiraa i to ˈna paturaa tau matahiti aˈenei. I teie nei râ, rahi atu â oe i te haapeu, no te mea ua faarirohia teie Piha a te Basileia no te hoê taime ei pu tauturu. Inaha, no tupu iho nei te hoê vero e te vaipue i to oe tuhaa fenua. Rave ihora te tomite amaa i te mau faanahoraa ia fanaˈo te feia tei roohia i te ati i te maa, te ahu, te pape mâ, e te tahi atu mau mea. Te mau ô atoa i horoahia mai, ua faanaho-maitai-hia. Mea anai te mau taeae e tuahine ia tii mai i ta ratou e hinaaro mau ra. Mea rahi ua tahe to ratou roimata no te oaoa.

Ua parau Iesu e e itehia o vai ta ˈna mau pǐpǐ i to ratou here te tahi i te tahi. (Ioa. 13:34, 35) I roto i teie tuhaa, e ite mai tatou i taua here Kerisetiano ra i roto i te mau paturaa e te mau ohipa tauturu a te mau Ite no Iehova. E haapapuraa puai mau te reira e te ora nei tatou i raro aˈe i te faatereraa a te Arii Iesu.