MU TO xachʼun yilel ti jaʼ Salon li bu oyote. Xamuyubaj onoʼox tajek yuʼun li salone, xuʼ van lekik kʼusi chvul ta ajol yuʼun kʼalal la akolta aba ta svaʼanel leʼ xa ta jayibuk jabile. Pe mas to van xamuyubaj ta skoj ti yakal chichʼ tunesel sventa te chakʼik li koltaele; yuʼun jaʼtik to kʼot nojelal ta voʼ ta skoj jun ikʼaloʼ xchiʼuk ti ep kʼusi la sokes li ta lume, jaʼ yuʼun li Komite sventa Betele ta anil noʼox la xchapan sventa xichʼ akʼbel sveʼelik li buchʼutik la sta svokolike, skʼuʼ spokʼik, voʼ ti stakʼ uchʼele xchiʼuk yan kʼusitik ti chtun yuʼunike. Lek chʼubabil skotol li ta salone. Lek cholol tsmala ch-akʼbatik kʼusi chtun yuʼunik li ermanoetike xchiʼuk ep buchʼutik chlokʼ yaʼlel satik ta skoj ti xmuyubajike.

Laj yal Jesus ti jaʼ mas ch-ojtikinatik-o yajtuneltak ti tskʼan sbaik ta jujuntale (Juan 13:34, 35). Li ta jvokʼ liʼe ta jchanbetik skʼoplal kʼuxi chakʼik ta ilel ti skʼanoj sbaik kʼuchaʼal yajtsʼaklomtak Kristo li stestigotak Jeova kʼalal tsvaʼanik li butik tstsob sbaike xchiʼuk li kʼusitik tspasik sventa tskoltaik li buchʼutik chil svokolike. Ti oy li kʼanelal taje jaʼ slekil kʼelobil ti jaʼ yakal tsventainutik li Jesuse.