AWANICISYE kuti akwinjila mkati mwa Nyumba ja Ucimwene ni akutenda lung’wanu mnope ni mwajikuwonecela. Aŵele ali mkusangalala ni Nyumba ja Ucimweneji kwandaŵi jelewu. Kombolekasoni kuti akukumbucila ndaŵi jakusangalasya ja ŵakamucisyaga nawo pamasengo gakutaŵa nyumbaji. Nambo sambano akusangalala mnope ni Nyumba ja Ucimweneji ligongo kwakandaŵi jiŵele malo gakupelecela cikamucisyo pandaŵi jajitendekwe ngosi ja m’cipago. Pandaŵi jakuti mumkuli mwawo mutendekwe cimbungo cekulungwa cacijonasile yindu yejinji, mwacitema Komiti ja Nyambi jilinganyisye yakupeleka cikamucisyo kwa abale ni alongo mwakwapa yakulya, yakuwala, mesi gambone gakumwa soni yindu yine. Yinduyi ayiŵisile m’Nyumba ja Ucimweneji mwadongosolo. Abale ni alongo akwinjila kukujigala yakusosecela yawo kwineku ali mkukoposya misosi ligongo lyakusangalala mnope ni cikamucisyoci.

Yesu jwasasile kuti kunonyelana jwine ni mjakwe ciciŵa cimanyilo cekulungwa pasikati pa ŵakumkuya ŵakwe. (Yoh. 13:34, 35) Mumbali ajino, citulole yatite Ŵamboni sya Yehofa pakulosya cinonyelo pamasengo gakutaŵa soni gakupeleka cikamucisyo pandaŵi jajitendekwe ngosi ja m’cipago. Yakusatenda Ŵamboni sya Yehofa pakulosya cinonyeloci, wuli umboni wekulungwa wakuti ali pasi pa Ucimwene wa Yesu.