LE KA tsʼoʼok u beetaʼal u Najil Reinooʼ jach kiʼimakchaj a wóol, tumen maʼ xaaneʼ táakpajech utiaʼal u beetaʼal. Baʼaleʼ beoraaʼ maas kiʼimak a wóol tumen táan u meyaj utiaʼal u yáantaʼal le máaxoʼob ku muʼyajoʼob yoʼolal junpʼéel loobil tsʼoʼok u yúuchloʼ, le oʼolal yaʼab baʼaxoʼob tsʼaʼan ichil yéetel maʼ ta kʼaj óoltik wa letiʼe Najil Reinooʼ. Tumen tsʼoʼok u máan junpʼéel chak ikʼal yéetel yaʼab loob tu beeteʼ, le Comité tiʼ Sucursaloʼ tu yaʼalaj ka tʼoʼoxok baʼal jaantbil, nookʼ, jaʼ yéetel baʼaxoʼob siʼib utiaʼal u yáantaʼal le máaxoʼob ku muʼyajoʼoboʼ. Le meyajoʼobaʼ teʼ Najil Reino ku beetaʼaloʼ yéetel le sukuʼunoʼoboʼ u tsolmubaʼob utiaʼal u kʼamkoʼob le baʼaxoʼob ku tʼoʼoxoloʼ. Yaʼab tiʼ letiʼobeʼ táan u yokʼoloʼob tumen kiʼimak u yóoloʼob.

Jesuseʼ tu yaʼaleʼ yaan u kʼaj óoltaʼal u disipuloʼob yoʼolal le yaabilaj yaan ichiloʼoboʼ (Juan 13:34, 35). Teʼ jaatsaʼ yaan k-ilik bix u yeʼesaʼal le yaabilaj ken beetaʼak u Najiloʼob Reino yéetel ken áantaʼak le máaxoʼob ku muʼyajoʼob yoʼolal wa baʼax loobiloʼ. Le yaabilaj beyaʼ ku yeʼesik tiaʼanoʼon yáanal u nuʼuktaj u Reino Jesuseʼ.