XCHAʼVOKʼAL
Tukʼuk me avoʼontonik ta jujuntal
«Ti kʼusi spasoj ta jun li Diose muʼyuk buchʼu xuʼ xchʼak.» (Markos 10:9)
Tskʼan Jeova «ti oyuc yutsil slequil» o stukʼil koʼontontike (Miqueas 6:8). Mas to me toj tsots skʼoplal ta sventa nupultsʼakaletik taje, yuʼun kʼalal muʼyuk stukʼil koʼontontike mu chʼunbaj li kʼusi chkalbe jnup jchiʼiltike. Vaʼun jaʼ mas ta jkʼan-o jbatik mi melel li kʼusi chkalbe jbatike.
Li avie muʼyuk xa mas buchʼu ti tukʼ yoʼonton ta stojolal li snup xchiʼile. Jaʼ yuʼun, sventa junuk noʼox avoʼonton li ta anupunele oy chaʼtos kʼusi toj tsots skʼoplal skʼan xapas.
1 JAʼUK MAS TSOTS SKʼOPLAL XAVIL LI ANUPUNELE
LI KʼUSI CHAL VIVLIAE: «[Naʼik me] li kʼusi mas tsots skʼoplale» (Filipenses 1:10). Jtos ti kʼusi toj tsots kʼoplal ta akuxlejale jaʼ me li anupunele. Jaʼ yuʼun skʼan me toj tsots skʼoplal xavil.
Li Jeovae tskʼan ti jaʼuk noʼox me kʼupiluk sba xavil li anup achiʼile xchiʼuk ti akʼo «cuxetuc noʼox avoʼnton» xchiʼuke (Eclesiastés 9:9). Jamal chalbutik ti skʼan mu jten li jnup jchiʼiltike, moʼoj, yuʼun skʼan jkʼeltik kʼusi skʼan jpastik sventa xmuyubaj noʼox kuʼuntik (1 Korintios 10:24). Akʼo jamaluk xil ti akʼanoje xchiʼuk ti toj ep sbalil chavil ti tskoltaote.
LI KʼUSI SKʼAN XAPASE:
-
Chʼakbo me yorail ti jmojuk xalotet xchiʼuk li anup achiʼile xchiʼuk tsʼet chikintao me lek li kʼusi chale
-
Nopo li kʼusi chakʼan ta achaʼvoʼalike, maʼuk noʼox xanop ta sventa atuk
2 CHABIO ME LI AVOʼONTONE
LI KʼUSI CHAL VIVLIAE: «Buchʼuuk noʼox ti te skʼeloj-o junuk ants ti oy ta yoʼonton tskʼupin yaʼie laj xa me sloʼla snup xchiʼil ta yoʼonton xchiʼuk li ants taje» (Mateo 5:28). Mi oy buchʼu tsnopilanbe skʼoplal li mulivajele yakal xa me tsmukul sati li snup xchiʼile.
Xi chal li Jeovae: «Tscʼan chanop lec li cʼusi chaticʼ ta avoʼntone» (Proverbios 4:23; Jeremías 17:9). Jaʼ yuʼun skʼan xavichʼ apʼijil ta sventa li kʼusi chakʼele (Mateo 5:29, 30). Chanbo stalelal li moltotil Jobe, yuʼun laj yalbe yoʼonton ti muʼyuk ta xpichʼ oʼonton yan antse (Job 31:1). Jpʼeluk me ta avoʼonton ti muʼyuk chakʼel pornografiae. Skʼan me jpʼeluk ta avoʼonton xtok ti muʼyuk chlik akʼan yan vinik o yan antse.
LI KʼUSI SKʼAN XAPASE:
-
Akʼo jamaluk xilik yantik ti toj tsots skʼoplal chavil li anup achiʼile
-
Tsako me lek ta venta li kʼusi oy ta yoʼonton anup achiʼile xchiʼuk mi muʼyuk lek chaʼi sba ta skoj ti oy buchʼu chachiʼin ta loʼile, mu xa me xachiʼin ta loʼil
