Kulobolana kunobaka imhuli impya. Kojoba uda akale ulemekeja bazwali babo, koga umwe uwo ndiye unhu waba ulokosha kasa kupinda banhu bose penyika. Yozwu zwungaba zwukukutu kumakamu awo kuti bezwitambule. Koga zwinolebwa neBhayibhili zwingakubhancha kuti usitaluke uunganu, kuti ugalisane mulunyalalo namakamu awo pawunobe shinga nesimba kubaka imhuli iyo impya.

ZWINOLEBWA NEBHAYIBHILI: “Lemesa tate namai babo.” (BaEfeso 6:2) Unokwelela kulemesa bazwali babo zwisineni kuti wakubuka zwilichini. Ziba kuti umwe uwo, unokwelela kubabayilila bazwali babe. “Ludo aluna ifupa,” nokudalo awutokwelela kubona sokuti umwe uwo wakulasha nechizato chokuti umuwililana nabazwali babe.​—1 BaKolinte 13:4; BaGalatiya 5:26.

ZWAWUNGATE:

• Usilebeleke uti “Makamu awo anogala endilingila pasi” kana kuti “Aamabo banosola zwose zwandinota”

• Kweja kuda bazwali boumwe uwo nenzila yaanobada nayo

ZWINOLEBWA NEBHAYIBHILI: “Unhulume unoosiya tate babe namai babe enamatile kunkaji uwe akale banooba inyama imwempela.” (Matangisilo 2:24) Pamunolobolana, bazwali benu bangayeya kuti muchiimo mumaboko abo, akale bangada kumubuja zwokuta pazwinhu zwose.

Iwi noumwe uwo ndimwi munokwelela kuvumilana nozwemiganu yamunobigila bazwali benu akale mubabuje nolulemekejo. Mungababhudila pachena koga musinobatuka. (Zwichimbe 15:1) Kuzwininipisa, kujikama, akale nokutobelejela zwinomubhancha kuti mube nobukamu bunoshantisa namakamu enu akale mundile mbeli “munyamulilana umwe noumwe noludo.”​—BaEfeso 4:2.

ZWAWUNGATE:

• Kana ushushikana nokuti makamu enu amungwinila mujinyaya jomungumba yenu, ulokwelela kulebeleka noumwe uwo mukajikama

• Vumilanani kuti muchapombosola chini inyaya yeji