Ọke i Jehova ọ ha ẹkwaphiẹrhotọre ekrun mwu, nọ ha emiemọ mwu nẹ aye i hẹrote emọ aye. (Colossians 3:20) Emiemọ i vwo owian aye ina hẹrote emọ aye vwo ẹguọlọ kpahen i Jehova, ji rhiẹ imirẹghwa ri te edje. (2 Timothy 1:5;3:15) O fori ne wu yono oborẹ ọ ha uvuẹn ọmudu ọmọ ọnọ. Itiọrurhomẹmro, udje ọnọ ọ ghanranren omamọ. Neneyo wu ki sabu yono ọmọ kpahen ẹmro Osolobrugwẹ, wu ne kiki yono oma vwẹre.—Psalm 40:8.

OBORẸ I BAIBOL NA Ọ TARE: ‘Are i kiki kerhọ, are i vwa kiki tẹmro-o.’ (James 1:19) Wu guọlọre taghene emọ i ta oborẹ ọ ha ẹhẹn aye wẹn. Jẹ aye rhe taghene wu mwuegbe wu na kerhọ aye ọke ephian. Guọlọ ekete rọ dabu serhọ, neneyo ọ phẹrẹ rẹ aye ina ta oborẹ ọ ha ẹhẹn aye wẹn. (James 3:18) Aye i rha mẹrẹnvwrurhe taghene wa djoma omamọ yanghene wu vwa kerhọ aye-e, aye i kwe ta oborẹ ọ ha ẹhẹn aye-e. Vwo erhionrin kpahen emọ enọ, ji dje rẹn aye ọke ephian taghene wu vwo ẹguọlọ kpahen aye.—Matthew 3:17; 1 Corinthians 8:1.

OBORẸ WU NA SABU RU:

• Mwuegbe wu ne lele emọ tẹmro ọke ephian

• Lele emọ tẹmro ọke ephian, o vwo rhiẹ ọke aye e vwo ebẹnbẹn ọvo-o

OBORẸ I BAIBOL NA Ọ TARE: “Ohworho ro dje oniso phia ẹmro ọrhọ homaphia ọnọ mẹrẹn efikparobọ.” (Proverbs 16:20) Ọkezẹko, o fori ne wu damoma vwẹruọ oborẹ emọ e roro, ukperẹ wu na kerhọ oborẹ aye a ta ọvo. Nime ọgbọ buebun, emọvwerhe a kpare ẹmro ta omamọ. “Ohworho ọrhọ kpahenrhọ ẹmro o ki rhon ọsoso iyẹnrẹn na fiotọre, emru akpa ọrhẹ ophọphọme.” (Proverbs 18:13) Wu vwe kiki tuekwẹre-e.—Proverbs 19:11.

OBORẸ WU NA SABU RU:

• Brorhiẹn taghene o toro oborẹ emọ na i tare-e, wu bru ẹmro ze unu aye yanghene biomevwa-an

• Damoma roro kpahen oborẹ wu ruru ọke wa ha ẹgbukpe aye ọrhẹ oborẹ ọ mai ghanren wẹn ọke ọrana

OBORẸ I BAIBOL NA Ọ TARE:“Ọmọ mẹ, ha ọghwọghwu ọsọ; ne wu jeghwai nyalele ọkpọvi izuo.” (Proverbs 1:8) Jehova ọ yẹ emiemọ omẹgbanhon rẹ aye ine yono emọ aye. Are ine vi yono emọ are nẹ aye i họghọ rẹn are ji huvwele are. (Ephesians 6:1-3) Emọ e kiki djokarhọ ye orhianẹ eri vwiẹre aye e vwo ‘iroro owu-u.’ (1 Corinthians 1:10) Are awanva erhe kwerhọ ẹmro owu-u, are i vwe djeyi phia nẹ emọ are i mẹrẹ-ẹn, nime ọrhọ lẹrhẹ aye họghọ rẹn are-e.

OBORẸ WU NA SABU RU:

• Are awanva i ta jeghwai kwerhọ oborẹ are ine yono emọ are lele

• Ohworho wa rọnmọ orho vwo iroro rọ vẹnẹ ọnọ kpahen oborẹ ene yono emọ na lele, damoma vwẹruọ iroro yi

OBORẸ I BAIBOL NA Ọ TARE:“Yono ọmọ izede ọnọ nyalele.” (Proverbs 22:6) Wa rha dabu djiroro-o, wu sabu yono emọ izede ro mwidjẹ-ẹn. O fori ne wu vwo izede wa ha yono emọ, ji ghwọghwu aye. (Psalm 127:4; Proverbs 29:17) Wu rha ghwọghwu emọ, o mevirhọ taghene wa ha oja riẹ aye-e, ọrẹn ọnọ ha userhumu rẹn aye vwẹruọ oborẹ ọsoriẹ we jurhi ezẹko rẹn aye. (Proverbs 28:7) Ji yono aye nẹ aye i vwo ẹguọlọ kpahen Ẹmro i Jehova ọrhẹ iruemru-urhi ri ha uvuien. (Psalm 1:2) Ọnana ọnọ ha userhumu rẹn aye vwo ẹhẹn obrorhiẹn rọ fonron.—Hebrews 5:14.

OBORẸ WU NA SABU RU:

• Damoma yono emọ nẹ aye i mẹrẹnvwrurhe taghene Osolobrugwẹ o nyerẹn, aye ina ji sabu hẹrosuiẹ

• Ha userhumu rẹn aye djokarhọ ji kẹnoma rẹn ekwakwa ri na sabu biomu uruemru aye, jerẹ eri ha uvuẹn itanẹti. Yono aye oborẹ aye ine ru kẹnoma rẹn ihworho ra guọlọ lele aye ruẹ irueruo ọfanrhiẹn