Menm si ou pe esey ou mye pour annan en maryaz ek en fanmir ere, en keksoz ki ou pa’n ekspekte i kapab arive ki fer li difisil pour gard ou lazwa. (Eklezyast 9:11) Avek lanmour, Bondye i donn nou led kan nou fer fas avek bann difikilte. Si ou aplik sa bann prensip dan Labib, ou ek ou fanmir pou kapab fer fas avek menm bann sityasyon pli pir.

KI LABIB I DIR: “Desarz tou zot sousi lo li, parski limenm ki pran swen avek zot.” (1 Pyer 5:7) Pa zanmen bliye ki Bondye pa devret ganny blanmen pour ou bann difikilte. (Zak 1:13) Anmezir ki ou apros avek Li, I pou ed ou dan sa pli bon fason. (Izai 41:10) “Devid zot leker avek li.”​—Psonm 62:8.

Ou pou osi trouv rekonfor kan ou lir e etidye Labib tou le zour. An retour, ou pou vwar konman ki Zeova i “konsol nou dan nou bann soufrans.” (2 Korentyen 1:3, 4; Romen 15:4) Bondye i promet pour donn ou son ‘lape ki depas tou konpreansyon imen.’​—Filipyen 4:6, 7, 13.

KI OU KAPAB FER:

• Demann Zeova son led pour reste kalm e pour reflesir byen

• Revwar tou ou bann opsyon e swazir sa enn ki pli bon pour ou

KI LABIB I DIR: “Leker en dimoun ki annan konprenezon i ganny plis konnesans e zorey sa enn ki saz i rod konnesans.” (Proverb 18:15) Rod tou bann fe. Rode ki sak manm ou fanmir i bezwen. Koz avek zot. Ekout zot.​—Proverb 20:5.

Me si en dimoun ki ou ti kontan i mor? Pa bezwen per pour eksprim ou santiman. Rapel ki menm Zezi “ti plere.” (Zan 11:35; Eklezyast 3:4) I osi enportan pour repoz e dormi byen. (Eklezyast 4:6) Sa pou fer li fasil pour fer fas avek en sityasyon difisil.

KI OU KAPAB FER:

• Avan ki problenm i arive, fer li en labitid pour gard sa bon kominikasyon dan ou fanmir. Kan problenm i leve, zot pou santi zot alez pour koze

• Koz avek lezot ki petet in rankontre menm sityasyon avek ou

KI LABIB I DIR: “En vre zanmi i kontan ou toultan, e i en frer ki’n ne pour letan ladetres.” (Proverb 17:17) Ou bann zanmi i anvi ed ou me zot kapab pa konnen ki pour fer. Pa bezwen ezite pour dir zot sa ki ou vreman bezwen. (Proverb 12:25) Deplis, rod led spirityel avek bann ki konpran Labib. Sa gidans ki zot pou donn ou dan Labib pou ed ou.​—Zak 5:14.

Ou pou ganny sa sipor ki ou bezwen ler ou regilyerman frekant bann dimoun ki annan lafwa dan Bondye e ki annan konfyans dan son bann promes. Ou pou osi trouv rekonfor kan ou ed lezot ki bezwen lankourazman. Partaz avek zot ou lafwa dan Zeova ek son bann promes. Reste okipe par ed lezot dimoun ki dan bezwen e pa izol ou avek bann ki kontan ou e enterese avek ou.​—Proverb 18:1; 1 Korentyen 15:58.

KI OU KAPAB FER:

• Koz avek en zanmi pros e les li ed ou

• Fer konnen sa ki ou vreman bezwen