Ka ma mɛni kəlee kɛ ka wɔ húlu yii da ka wɔ pɛlɛn ɲii lɛlɛ mɛni ɓa, mɛni ɲaa nwanaa yii ka kili ho kɛ ma, a pɛli həlii kaa. Yili a pɛli gɛi, gɛ laa ə wala, ka wɔ kwəinɛɛ ə lɛɛ kaa yəi (Kilimaa mun 9:11). Kəlaa naalowai, Yálá a pɛli kpɔnmaa tɛɛi ka pɔ wɛlikɛmaa laa hu. Ka Yálá ŋɔ tɔn nwooɠaa ŋɛi pɔ túwɔ́ ɓo, ka ka yəi bɛlɛn nua ka kaa pai tɔɔ kpaan mɛni ɲaa nwanaa huwui lɔpee gəlee hu.

YII BIBLƏ KAA MOI : « Ka pa a ka wɔ liihɛlɛn mɛniɠaa kəlee ka nɛ ma. Maahɔlɔɓo, a ka maakpaan gbɛɛ » (Piɛli dɔlɔɔ 5:7). Ka ka kili lɛɛ ɉu a lowai kəlee, kaa ma Yálá hwəi a mɔnɔ laa gu mɛi (Zaakə 1:13). Ka ka maalɛɠɛ ma, kpɔnmaa yii ka kili ho kɛ ma a dɛɛ ka pɔ (Izai 41:10, TMN). « Ka ka kwəi mɛni ɓo ma » (Somə 62:8, TMN).

Ka kɛi Biblə ɓo holo kəlee ə lɛɛ kaa galan, ka hwaŋa kaa pai lɔi. Pələi Zehova a « gu hwaŋalɔ [la] gu wɔ mɔnɔ mɛɛɠaa kəlee hu », ka kaa pai gaai (Kɔlɛntə veelɛnaa 1:3, 4 ; Rɔmu 15:4). Zehova aa mo yɛ gaa pai « ŋɔ liilaa yii gɛnɛɛ dɛɛ nu ŋɔ mɛni kɔlɔnŋaa ɓa », tɛɛi ka pɔ (Filipə 4:6, 7).

YII KA PƐLI GƐI :

• Zehova hwɛli ə kpɔnmaa tɛɛ ə́ pɔ, yii yaan ə́ hu ho pu yɛ́, ə lɛɛ ə́i kiliŋahiɛ a nɛlɛɛ

• Mɛniɠaai ya pɛli gɛi, yii kpɔ nɛlɛɛ, ɉəɠə ɉu ə́ gɛ

YII BIBLƏ KAA MOI : « Nwun gɛ ɉu mun lii laa a hwɛɛ a mɛni kɔlɔnŋaa, ə lɛɛ kilimaa mun nwəli a mɛni kɔlɔnŋaa kwɛli » (Haŋɔn 18:15, TMN). Mɛniɠaa hukulaa kaa. Ə́ yəi bɛlɛn nua tɛi-tɛi kəlee maakpaan gɔlɔn. Hwaa di pɔ, ə lɛɛ ə́i wəli tɔɔ diɛ (Haŋɔn 20:5, TMN).

Ə́ wɛlikɛmaa mun da a haa, lə ɓə ya gɛ ? Hó nwumɛ wɔlɔi. Ə́ kili lɛɛ ɉu yɛ́ ma Zesu « ə wɔlɔ ». (Záán 11:35 ; Kilimaa mun 3:4.) Ya ə́ hwiitɔɔ ə lɛɛ ə́ yii, yili a kpɔnmaa tɛɛ ə́ pɔ (Kilimaa mun 4:6). Ya kɛi gɛ tii, gɛ laa kaa pai nɛɛi yɛ́ tɔɔ kpaan mɛni ɲaa nwanaa hu.

YII KA PƐLI GƐI :

• Gɛɛ mɛni ɲaa nwanaa ho laa kaa, maanɛɛ lono yɛ ɓo ka ə́ yəi bɛlɛn nua ka lowai. Yili a kɛ tii, mɛni ɲaa nwanaa a laa kaa, di ho pai nwumɛi hwaai ə́ pɔ, di ho nwɔnɔ pai ɲɔuii hwaai ə́ pɔ

• Nua mɛnii tii ta aa ta laa diɛ, ə́ woo hukulɔ diɛ

YII BIBLƏ KAA MOI : « Ɓəlan neelee a nu wɛlilakɛ a lowai kəlee, ə lɛɛ gaa a nan non yii di gaa nu maakpɔnmaa ɓo mɛni ɓa mɛni ɲaa nwanaa hu » (Haŋɔn 17:17, TMN). Ə́ ɓəlaa kaa pai kɛi bɔ di kpɔnmaa tɛɛ ə́ pɔ, kəlaa pələi maanɛɛ di gɛ la, di hwa kɛ bələ kaai. Mɛnii ə́ maakpaan gaa ma, hó ə́ kpɔɔ hu hon moi diɛ (Haŋɔn 12:25, TMN). Nua da Biblə ɲaakaa, lɛɠɛ diɛ di kpɔnmaa tɛɛ ə́ pɔ a Yálá lawoo. Biblə ŋɔ liɛwooɠaai di kaa pai gɛi yɛ́, da kpɔnmaa tɛɛ ə́ pɔ (Zaakə 5:14).

Nua di laa Yálá da ŋɔ mɛni laakwəlamoɔɠaa di la, ka diɛni ka kɛi ka ŋaakpɔn, hwaŋalɔ yii ə́ maakpaan gaa ma, ə́ kaa pai ɉɔlɔɓoi. Ya kɛi nu takpɛliɠaa hwaŋalɔ, yɛ́ kpɛli ə́ hwaŋa a lɔ. Laana laa yii gaa ə́ yəi, yɛ hwilɛn na Zehova da ŋɔ mɛni laakwəlamoɔɠaa diɛ, da ɓo diɛ. Kpɔnmaa tɛɛ nu takpɛliɠaa pɔ ə lɛɛ hó ə́ maakwea ə́ wɛlikɛmaa nua diɛ, da nua yiiɠaa da ə́ maa liihɛlɛn ɉee (Haŋɔn 18:1, TMN ; Kɔlɛntə dɔlɔɔ 15:58).

YII KA PƐLI GƐI :

• Ə́ woo hukulɔ ə́ ɓəlan mun neelee ta ɓa, ə lɛɛ ə́ nɛɛ laa ə kpɔnmaa tɛɛ ə́ pɔ

• Yii kpɔ ə́ maakpaan gaa ma, mo a teɲa