Maski nu kuannu i adde na mawayyanu nga mapeggan tu magayayya nga familia, egga lagapa mesimmu ira nga ariannu ekspektan yari tu mafektan i pagayayyanu. (Eclesiastes 9:11) Nu mariga i situasionnu, siaaya nga uffunan nakamu na Dios. Nu meyaplika i prinsipio ira na Biblia, makayanan na familianu maski i pinakamariga nga situasion.

I KAGIAN NA BIBLIA: ‘Ipammakatalo nu sa ngamin i kavurungan nu ta yayya i manangngal nikamu.’ (1 Pedro 5:7) Kanayung nga nonoppannu nga ari tu i Dios i mapaliwa ta ziga-riganu. (Santiago 1:13) Nu tulu-tuluy i madukko nga relasionnu nisa, mas moffunakkamu. (Isaias 41:10) “Ngamin i vuru-vurung nu en-nu sa nga kagian.”​—Salmo 62:8.

Mabannabannayakka gapa nu bibbigan anna gigiammuammu i Biblia ta inaggaw. I resulta na, masitam nu kunnasi nga bannabannayan ittam ni Jehova ta ngamin nga ziga-riga. (2 Corinto 1:3, 4; Roma 15:4) Nepromesa na Dios nga ‘iyawa na nikamu i imammo na nga ari malippawa na tolay.’​—Filipos 4:6, 7, 13.

NU ANNI MAKUAM:

• Ipakimallo i uffun ni Jehova tapenu kalmadu anna makanono ka tu mapia

• Ammuamu i puedem nga kuan anna piliammu i pinakamakasta

I KAGIAN NA BIBLIA: “I futu na tadday nga makalippawa makala tu pakannammu, anna i talinga na masirib ay magaleg tu pakannammu.” (Proverbio 18:15) Innammu tu mapia i situasion. Ammuammu i mawag na miembro na familiam. Makibbida anna magginna tannira.​—Proverbio 20:5.

Kunnasi nu matay i tadday nga kafamiliam? Ariammu fugaddang i emosionmu. Nonoppammu nga “siminangi” maski si Jesus. (Juan 11:35; Eclesiastes 3:4) Importante tu magibannag anna makkatrugka tu mapia. (Eclesiastes 4:6) Maka-uffun yaw tapenu mattammammu i kaddaraddam nga situasion.

NU ANNI MAKUAM:

• Kanayung nga makibbida ta kafamiliam maski nu awang tu trahedia. Sonu egga problema, ariadda marigatan nga makibbida tannikaw

• Makibbida gapa ta tanakuan nga neparubang ta parehu nga situasion

I KAGIAN NA BIBLIA: “I kurug nga kofun ay mangipasingan tu aya ta ngamin nga tiempu, anna tadday nga wagi nga meyana nu egga i ziga.” (Proverbio 17:17) Ikaya na kofummu nga moffunakka ngem baka ariadda ammu nu kunnasi. Ariammu mappasiran nga mangikagi ta talaga nga kawagammu. (Proverbio 12:25) Mappoffunka gapa ta aru pakannammuna ta Biblia. Makoffun i meyawada nga giya naggafu ta Biblia.​—Santiago 5:14.

Moffunakka nu kanayung nga makivulu ta totolay nga fustu angngurugda anna danuri mattiwala ta promesa ira na Dios. Mabannabannayakka paga nu uffunammu danuri makawag gapa tu mapasikan i nonoda. Kagiammu tannira nu ngatta mattiwala ka kani Jehova anna ta promesa na ira. Mabbaling tu okupadu ta panguffun ta totolay anna ariammu isisina i baggim ta mangaya anna mangikavurung ira tannikaw.​—Proverbio 18:1; 1 Corinto 15:58.

NU ANNI MAKUAM:

• Makibbida ta madukko nga kofummu anna alawatan i uffunna

• Espesipiko nga kagian i kawagammu