Ambe mu pange na ndzili yose linga mu yoye na ndzolela ha ndzivo na mu vulo vuenu, kasi kue ku soloka viuma vie ku neha vusiua. (Ekelesiaste 9:11) Njambi ua cilemo ue ku tu hana vukuasi mu ntsimbu ya tuyando. Nga mu ka kavangeya vino vimamuna via mu Mbimbiliya vi na hatako, nenu na vakua ndzivo yenu mu ka hasa ku lua na nkala visoti vi ka mi solokela ha ndzivo.

MBIMBILIYA NGUAYO: “Mbilenu cisoti cenu cose kuli ikeye, muomu ikeye a mi lela.” (1 Petulu 5:7) Ntsimbu yose vulukenu ngecize Njambi kati ikeye ue ku tu kokela vieseko. (Tiango 1:13) Njambi a ka mi kaniamesa cikuma nga mu suena mu hiehi neni. (Isaya 41:10) “Muanienu mutima uenu ku meso eni.”—Visamo 62:8.

Mu ka uana naua ku lembezieka nga mu tanda Mbimbiliya na ku lilongesayo tangua na tangua kaha mu ka mona vati Yehova ue ku “tu lembezieka ku lamba yetu yose.” (2 Kolintu 1:3, 4; Loma 15:4) Na likuminia ku mi hana “ciyulo ca Njambi cize ca hiana mana ose.”—Filipu 4:6, 7, 13.

VI MUA PANDE LINGA:

• Lombenu Yehova a mi kuase ku tula mutima na ku singanieka vuino

• Ha vinjila vi muli navio, hangulenuho ya cili i mu linga viuma

MBIMBILIYA NGUAYO: “Mutima ua mukua liano u uana mana; na lituitui lia vakua mangana li lengeya mana.” (Visimo 18:15) Tantekeyenu cimpande cose mu vutuntu. Lengeyenu ku tantekeya viose vi va tonda vakua ndzivo yenu, muntu ku muntu. Handekenu navo na ku va halakana.—Visimo 20:5.

Vati nga mu tsisa umo ua ha mutima? Kati mu ivue ntsoni ya ku lila. Vulukenu ngecize na “Yesu ua lilile.” (Yoano 11:35; Ekelesiaste 3:4) Kaha ca pua ca seho ku uana ntsimbu ya ku huima na ku kosa. (Ekelesiaste 4:6) Eci ci ka mi kuasa ku lua na visoti.

VI MUA PANDE KU LINGA:

• Ntsimbu kanda visoti vi ize, puenu na ku simutuila na vakuenu ha ndzivo Linga va kevue ku zituka mu ku handeka nenu omo ku ka soloka visoti

• Handekenu na vakuenu va na hiti mu vieseko viaco

MBIMBILIYA NGUAYO: “Kavusamba a lema ntsimbu yose na muanetu na semuuila mu ku kuasa ku lamba.” (Visimo 17:17) Vavusamba vuenu va tonda ku mi kuasa, vunoni halumo ka va tantekeya vi ka va na pande ku linga. Ngeci mukemuo, kati mu likele ku va leka viuma vi mu tonda mpundu. (Visimo 12:25) Kaha naua lengeyenu vukuasi kuli vaze va tantekeya vuino Mbimbiliya va mi kaniamese na mezi a Njambi. Vimamuna vi ve ku hana vi ka mi kaniamesa.—Tiango 5:14.

Mu uana vukuasi vu muli na ku tonda nga mu likuatasiana na vaze va tsiliela Njambi na ku kulahela mu vikulaheso vieni. Mu uana naua ku lembezieka ca kama omo mu kaniamesa vaze vali mu vusiua. Va lekenuko via lutsilielo luenu muli Yehova na ku vikulaheso vieni. Lihakelenu kapandi ka ku kuasa vantu veka vaze va tonda vukuasi, kaha kati mu sondoloke kuli vaze va mi lema na ku haka seho.​—Visimo 18:1; 1 Kolintu 15:58.

VI MUA PANDE KU LINGA:

• Handekenu na kavusamba ua ha mutima a mi kuase

• Handekenu mpundu vi mu tonda