Azhą́ shı̨́ı̨́ ahísółkéegi dóó nighan hazʼą́ągi wołíbee bił dahózhǫ́ǫgo íínísin ndi, doo naawódlí yę́ęgi áhootʼįįh. Éí nił hózhǫ́ yę́ę nitsʼą́ą́ʼ yidoołchxǫǫł. (James 4:14) Nihichʼįʼ dahodiiʼnáahgo God ayóóʼánihóʼnínígíí biniinaa yee nihíká adoolwołígíí nihá yisłá. Tsʼídá yéigo nihichʼįʼ dahwidiiʼnáahgo, Diyin Bizaad binahjįʼ bee naʼnitinígíí bikʼeh honíłʼı̨́įgo éí nighan hazʼą́ą́dóó bee hadaʼíínółníi doo.

DIYIN BIZAAD KÓNÍ: “Nihidaʼdiiłʼáhígíí tʼáá ałtso baa dahidohʼaah, háálá nihíneedlı̨́įgo nihaa áhályą́.” (1 Peter 5:7) Díí tʼáá áłahjįʼ béénílniih, nahóhodiʼnitaahgo éí God biniinaa doo bikʼíhátʼáah da dooleeł. (James 1:13) God áhą́dígo bił honílǫ́ǫgo éí hazhóʼó níká adoolwoł. (Isaiah 41:10) “Bídin danohłíinii tʼáá ałtso danihijéí tłʼááhdę́ę́ʼ bee bił dahołneʼ.”​—Psalm 62:8.

Diyin Bizaad tʼáá ákwíí jı̨́ yííníłtaʼ dóó baa íhołʼaahgo éí bee niyiʼdę́ę́ʼ hááh hwiildóoh doo. Áko “tʼáá ałtsojįʼ atínihiʼdilʼı̨́įgo” éí Jiihóvah ‘hanihiʼiyoołníihgo’ baa ákodíníizįįł. (2 Corinthians 1:3, 4; Romans 15:4) “Diyin God bitsʼą́ą́dę́ę́ʼ bee achʼįʼ hózhǫ́ náhásdlı̨́įʼii, akʼidiʼyiitįįh tʼáá ałtso yiláahdi átʼéii,” ni doogo yee nichʼįʼ ádee haadzííʼ.​—Philippians 4:6, 7, 13.

DÍÍ BIKʼEH ÁDÍÍNÍÍŁ:

• Tʼáadoo nitsináshtłiʼgóó hazhóʼó nitséskees doo diníigo Jiihóvah néiníkąąh

• Ádííníiłgi tʼáá ałtso hazhóʼó dínííłʼįįł, áádóó ná yáʼátʼééh dooígíí nídidíílééł

DIYIN BIZAAD KÓNÍ: “Hóyáanii bijéí yee ił ééhózin nishóyoołtʼeeh, áádóó hóyáanii ił ééhózin hátʼı̨́įgo yíká” íistsʼą́ą́ʼ. (Proverbs 18:15) Nighan hazʼą́ągi tʼáá ałtso bichʼįʼ háánídzih dóó hazhóʼó yíísíníłtsʼą́ąʼgo bee bichʼįʼ anídahaztʼiʼígíí nił bééhoyoozįįh.​—Proverbs 20:5.

Ayóóʼííníʼnínígíí łaʼ nitsʼą́ą́ʼ ádin silı̨́įʼgoshąʼ? Yínííł nílı̨́įgi tʼáadoo tʼóó bił ánítʼéhé, nicha. Shą́ą́ʼ Jesus ndi “atídineesdlı̨́ı̨́ʼ,” doodaiiʼ jíícha. (John 11:35; Ecclesiastes 3:4) Hazhóʼó hááʼáyı̨́ı̨́h dóó awoshgo ałdóʼ yáʼátʼééh. (Ecclesiastes 4:6) Áko éí bee yínííł ániilaaígíí bichʼįʼ haʼíínílı̨́į doo.

DÍÍ BIKʼEH ÁDÍÍNÍÍŁ:

• Tʼahdoo anídahaztʼiʼ haleehdą́ą́ʼ nighan hazʼą́ą́dóó hazhóʼó bił ałchʼįʼ háánídzihgo bíníldin. Áko anídahaztʼiʼ haleehgo doo náhontłʼagóó nichʼįʼ yaa yádaałtiʼ doo

• Tʼáá ákótʼéego łaʼ bichʼįʼ nidahwiisʼnááʼígíí bił baa yáníłtiʼ

DIYIN BIZAAD KÓNÍ: “Akʼis éí tʼáá áłahjįʼ bił ayóóʼáhijóʼníi łeh, áádóó hade áhootʼįįhgo tʼáá łaʼ bił hajííʼáázh yileeh.” (Proverbs 17:17) Nikʼis shı̨́ı̨́ níká adeeshwoł nízin ndi, ná ádooníiłgi bá nanitłʼa łeh. Tʼáadoo tʼą́ą́ʼ kónítʼéhé, haʼátʼííshı̨́ı̨́ íiyisí bídin nílínígíí bee bił hólneʼ. (Proverbs 12:25) Áádóó ałdóʼ Diyin Bizaad ayóo yedaʼaniihígíí yee níká adoolwoł biniyé hánítʼı̨́. Éí Diyin Bizaad biiʼdóó nił ííshjání ádayiilaaígíí níká adoolwołgo átʼé.​—James 5:14.

God áádóó yee ádee hahasdzíiʼii dayoodlánígíí tʼáá ahą́ą́h bił ahéédiikah. Áko éí bee níníłdzil doo. Dóó nááná łaʼda haʼólní dooleeł nízingo bíká anánílwoʼ éí ałdóʼ bee haʼíínílníi doo. Jiihóvah dóó yee ádee hahasdzíiʼii yinídlánígíí bee bił hólneʼ. Diné bichʼįʼ anídahaztʼiʼígíí bíká anánílwoʼgo binanilnish. Áádóó ayóóʼádanóʼníigo naa aʼááh danízinígíí tʼáadoo bitsʼąą tʼah sahdii naʼádíltʼeʼé.​—Proverbs 18:1; 1 Corinthains 15:58.

DÍÍ BIKʼEH ÁDÍÍNÍÍŁ:

• Áhą́dígo nikʼis áníłʼínígíí łaʼ bichʼįʼ hadíídzih áádóó bíniʼdii níká adoolwoł

• Haʼátʼííshı̨́ı̨́ íiyisí bídin nílínígíí hazhóʼó bee bił hodíílnih